მერიის უსაფრთხოებისს სამსახურის უფროსს, ნუგზარ ჭონქაძეს, რომელსაც სულიკო კედელაშვილის ყალბი ანგარიში აქვს, აქტივისტებმა "სულიკო" უმღერეს. პარლამენტთან შეკრებილები მას სულიკო-ნუგზარსაც ეძახიან.

სანამ ჭონქაძე აქტივისტებთან სიტყვიერ დაპირისპირებაში შევიდოდა, მან დეპუტატ ნიკა მელიას ჯამბაზის ქუდი მიუტანა. მოგვიანებით კი მან აქტივისტებთან ერთად სელფი გადაიღო, თუმცა არ უპასუხა ჟურნალისტების კითხვებს იმაზე, თუ რატომ შლიან კარვებს.

2 წლის წინ ნუგზარ ჭონქაძემ დაადასტურა, რომ მას ეკუთვნოდა სულიკო კედელაშვილის ანგარიში, რომელიც შეურაცხმყოფელ პოსტებს წერდა. ის აცხადებდა, რომ ეს ანაგრიში ხალხისთვის შექმნა, რომლებსაც "ხისტი პოზიციის დაფიქსირება" სჭირდებოდათ. ბრალდებების პასუხად კი ამბობდა, რომ არ არის ჰომოფობი და ფაშისტი. სწორედ ამიტომ ეძახიან მას სულიკო-ნუგზარს.

პარლამენტის წინ კარვების აყრისა და ტერიტორიის გაწმენდის შემდეგ საბავშვო ატრაქციონებს ამონტაჟებენ. ტერიტორია 31 დეკემბერს, დაახლოებით, ღამის პირველის ნახევარზე გაწმინდეს. კარვების გარდა, რუსთაველის გამზირზე იყო აქციებისთვის საჭირო ატრიბუტიკა — დროშები, "გახარიას ბიუსტი" და ბანერები.

თბილისის მერიამ კარვების აყრა საახალწლოდ, 2018 წელსაც სცადა. მაშინ რუსთაველის გამზირზე აქციებს ზაზა სარალიძე და მალხაზ მაჩალიკაშვილი ატარებდნენ. სამოქალაქო აქტივისტების, ოპოზიციისა და არასამთავრობო ორგანიზაციების წინააღმდეგობის შემდეგ თბილისის მერიამ კარვების აყრა ვერ შეძლო, რუსთველზე კი უფრო მეტი კარავი გაიშალა. მერიას მოუწია საახალწლო ღონისძიებები პირველი რესპუბლიკის მოედანზე გადაეტანა.