პეტიციას, რომელიც სიდნეიში საახალწლო ფეიერვერკების გაუქმებასა და ამ თანხით ავსტრალიაში ხანძრებთან ბრძოლას ითხოვდა, 270 ათასამდე ადამიანმა მოაწერა ხელი.

წინა წელს სიდნეის ფეიერვერკებზე ოთხი მილიონი დოლარი დაიხარჯა.

ავსტრალიის ხანძრებმა უკვე 480 მილიონი ცხოველი შეიწირა. უპრეცედენტო ხანძრები 3,8 მილიონ ჰექტარზე გავრცელდა, დაიღუპა ათამდე ადამიანი, დაიწვა ათასობით სახლი.

"2019 წელი კატასტროფული წელი იყო ავსტრალიისათვის. მიეცით ფეიერვერკებისთვის განკუთვნილი თანხები მეხანძრეებს, ფერმერებს და ცხოველებზე მზრუნველებს. გადაარჩინეთ ავსტრალიის ბუნება. ჰაერში ისედაც საკმარისი კვამლია", - ნათქვამია პეტიციაში.

სიდნეის მერმა კლოვერ მურმა განაცხადა, რომ ფეიერვერკების შოუს შეჩერება შეუძლებელია.

"მიუხედავად "ღრმა სიმპატიებისა" პეტიციის ხელისმომწერების მიმართ, ფეიერვერკები 15 თვით ადრე დაიგეგმა და ბიუჯეტიც თითქმის მთლიანად დახარჯულია. რომც შეგვეძლოს ფეიერვერკებზე უარის თქმა, ამას პრაქტიკული შედეგი ვერ მოჰყვებოდა", - დაწერა მერმა პეტიციის გვერდზე.

ავსტრალია უკვე რამდენიმე თვეა, ტყის ხანძრებს ებრძვის. კონტინენტზე რეკორდულად მაღალი ტემპერატურა და სასტიკი გვალვა დაფიქსირდა.

ახალი სამხრეთ უელსი, სადაც სიდნეია განლაგებული, ყველაზე მეტად დაზარალდა. რეგიონში დაახლოებით 100 ხანძარი მძვინვარებდა.

ფოტო: David Gray / Getty Images

ქალაქი ბალმორალი, რომელიც სიდნეის სამხრეთ-დასავლეთითაა განლაგებული, 22 დეკემბერს თითქმის მთლიანად განადგურდა და ქალაქისკენ მიმავალი მთავარი გზები ჩაიკეტა.