ერთ დროს უკრაინის ჩრდილოეთით, ბელორუსიის საზღვართან ახლოს მდებარე ქალაქ პრიპიატში 47 000 ადამიანი ცხოვრობდა, მაგრამ ატომურ ელექტროსადგურზე მომხდარი აფეთქების შედეგად გამოწვეული რადიაციული დაბინძურების გამო მოსახლეობის ევაკუირება მოხდა და მას შემდეგ იქ მუდმივად აღარავინ ცხოვრობს.

33 წლის შემდეგ პრიპიატის ყოფილი მაცხოვრებლები მიტოვებულ ქალაქში, რომელიც ჩერნობილის ატომური ელექტროსადგურიდან 3 კილომეტრში მდებარეობს, საახალწლო ნაძვის ხე დადგეს და ოჯახის წევრების ფოტოებით გააფორმეს.

ეს კამპანია ჩერნობილში ტურისტული ტურების ასოციაციამ დაგეგმა, რომლის ფარგლებშიც მონაწილეების ნაწილმა ნაძვის ხე საათის დიზაინის დეკორაციებითაც გააფორმეს, როგორც "სიმბოლო დროის დინების, რომ ქალაქი არ მომკვდარა და მისი ხელახალი გაცოცხლების დროა".

ტურისტული ტურების ასოციაციის წარმომადგენლის, კატერინა სლამოვას განცხადებით, ეს პირველი შემთხვევა იყო, როცა პრიპიატის მაცხოვრებლების ნაწილი ევაკუაციის შემდეგ ქალაქში დაბრუნდნენ.

"ქალაქმა სიცოცხლე უნდა განაგრძოს და ეს რომ მოხდეს, ჩვენ მისი გადარჩენა უნდა ვცადოთ", — განაცხადა მან.