შინაგან საქმეთა სამინისტროსთან შმAXI-ის მძღოლები აქციას მართავენ. როგორც აქციის მონაწილეები ამბობენ, ისინი მათ მიმართ შსს-მიერ გამოწერილი ჯარიმების გაუქმებას ითხოვენ. მძღოლები ერთთვიან ვადას ითხოვენ იმისთვის, რომ ახალი ლოგო დაამზადონ განსხვავებული ტრაფარეტისთვის და განაგრძონ საგანმანათლებლო საქმიანობა.

როგორც გირჩის ერთ-ერთი ლიდერი ზურაბ ჯაფარიძე აცხადებს, თბილისის საკრებულომ ტაქსით გადაყვანის ნებართვის შესახებ მუხლი "ჩუმად დააკორექტირა", რომლის მიხედვითაც ახლა ტაქსის ნიშანთან მიმსგავსებული ტრაფარეტის გამოყენებაც აიკრძალება.

"ეს ცვლილება დადგენილებაში შეიტანეს ჩუმად და ნებისმიერი ნიშანი, რომელიც ვიღაცამ შეიძლება ჩათვალოს, რომ ჰგავს TAX-ის ნიშანს, შეიძლება გახდეს დაჯარიმების საფუძველი და ახლა ამ წინასაახალწლოდ დაერივნენ შმAXI-ისტებს. ვითხოვთ, პირველ რიგში მაგ ჯარიმების გაუქმებას და მეორე, ამ რეგულაციების საერთოდ ჩახსნას", — აცხადებს ჯაფარიძე.

შმAXI-ის შესახებ

კომპანია შმAXI გირჩმა თბილისში ტაქსის რეგულაციების ამოქმედების გასაპროტესტებლად დააფუძნა. პარტიაში აცხადებენ, რომ კომპანია უნივერსიტეტია და მოქალაქის ერთი ადგილიდან მეორე ადგილზე გადაყვანის დროს საგანმანათლებლო საქმიანობას ეწევა. რეალურად შმAXI არის გზა, რომლის საშუალებითაც ტაქსის რეგულაციის თავის არიდებაა შესაძლებელი და მძღოლებს ნებისმიერი ფერის მანქანით მგზავრის გადაყვანა შეუძლიათ.