ბათუმის საჯარო ბიბლიოთეკაში მულტიფუნქციური საგანმანათლებლო სივრცე გაიხსნა

ბათუმის საჯარო ბიბლიოთეკაში ბათუმის მერიის მხარდაჭერით ახალი საგანმანათლებლო სივრცე გაიხსნა. სივრცე მულტიფუნქციურია და მოიცავს რარიტეტული წიგნისა და საფოსტო მარკების მუზეუმს, ბავშვთა და საკონფერენციო ოთახებს, პრესის ოთახსა და დეპოზიტარიუმს. 21 დეკემბერს საგანმანათლებლო სივრცე ეროვნული ბიბლიოთეკის დირექტორმა გიორგი კეკელიძემ და ბათუმის საჯარო ბიბლიოთეკის დირექტორმა ინგა გოგიბერიძემ გახსნეს.

"ამაყი ვარ: ბათუმის საჯარო ბიბლიოთეკაში ახალი საგანმათლებლო სივრცე გავხსენით. ოდესღაც უფერული გიგანტური საცავი დღეს ინგა გოგიბერიძის და მისი კოლეგების უდიდესი შრომის შედეგად მულტიფუნქციური კომპლექსი შეიქმნა - წიგნის მუზეუმი, საფოსტო მარკების მუზეუმი, საბავშვო სამკითხველო და ა.შ. ჩვენ ერთად ძალიან მალე ბიბლიოთეკებს ქვეყნის ცენტრალურ საგანმანათლებლო დაწესებულებებად ვაქცევთ!" —განაცხადა გიორგი კეკელიძემ.

ბათუმის საჯარო ბიბლიოთეკის დირექტორი ინგა გოგიბერიძე აცხადებს, რომ ბიბლიოთეკაში გახსნილ ახალ საგანმანათლებლო ცენტრში განთავსდება საფოსტო მარკების სამუზეუმო და დეპოიზიტარიუმის ოთახი.

"აქ გამოფენილია საფოსტო მარკები 1992 წლიდან დღემდე. 500 მარკა საქართველოს ფოსტამ გვაჩუქა, ნაწილი კი შევიძინეთ და გვაქვს ძალიან საინტერესო კოლექცია; ახალ სივრცეში განთავსდა ასევე დეპოზიტარიუმის ოთახი; ბავშვთა ოთახი, სადაც ჩატარდება პროექტი "კითხვის დრო ინგასთან ერთად". ამ ოთახში გამოფენილია უახლესი საბავშვო ლიტერატურა; გავხსენით ჩვენს ფონდში დაცული იშვიათი გამოცემების სამუზეუმო ოთახი, სადაც გამოვფინეთ რარიტეტული წიგნები როგორც ქართულ, ისე უცხო ენებზე.

აქვე აღვნიშნავ იმასაც, რომ მწერალ პარმენ ლორიას ოჯახმა გადმოგვცა მწერლის მოვერცხლილი სამაგიდო კალენდარი, კარადა და პირადი ბიბლიოთეკა. ეს ნივთებიც მუზეუმში განვათავსეთ. გავხსენით საკონფერენციო ოთახი, სადაც ჩატარდება სხვადასხვა ტიპის ტრენინგები. ასევე გვაქვს პრესის არქივის ოთახი, სადაც განვათავსეთ ჩვენი უნიკალური პრესის კოლექცია. ბათუმელების აღფრთოვანება გამოიწვია იმან, რომ ახალი სივრცის კედლებზე განვათავსეთ აჭარაშიმოღვაწე მწერლების, პოეტების, საზოგადო მოღვაწეების ხელნაწერები. ეს ყველაფერი კი ბათუმის მერიის მხარდაჭერით გახდა შესაძლებელი", — განაცხადა გოგობერიძემ.