თუ შენ ან შენს ახლობელს გაქვთ სუიციდური აზრები, აუცილებლად უნდა დარეკოთ ფსიქოლოგიური დახმარების ცხელ ხაზზე.

მანდატურის სამსახურის ბაზაზე არსებული ფსიქოლოგიური საკონსულტაციო მომსახურების 24-საათიანი ცხელი ხაზი: 08 00 00 00 88;

ბავშვთა დახმარების ცხელი ხაზი: 116 111; 2 421 422;

ფსიქო-სოციალური მომსახურების ცენტრის ცხელი ხაზი: 2 200 220 (3025)

საქართველოს პრეზიდენტი სალომე ზურაბიშვილი დღეს, 21 დეკემბერს 15 წლის ლუკას სამოქალაქო პანაშვიდზე იმყოფებოდა. მან გარდაცვლილის ოჯახს მიუსამძიმრა და განაცხადა, რომ ეს საზოგადოების ტრაგედიაა.

ზურაბიშვილმა ისაუბრა იმაზეც, რომ საჭიროა დროული რეაგირება და მუდმივი ლანძღვა ადამიანებზე ტოვებს კვალს.

"მგონი ყველას გვმართებს ვიფიქროთ იმაზე, რომ ამდენი ლანძღვა, უნდობლობა, დაუნდობლობა და უიმედობა არ ჩაივლის ისე, რომ არ დატოვოს თავისი კვალი და ეს არის კვალი. იმის მაგივრად, რომ მერე ვიტიროთ, მანამდე ვიფიქროთ", — განაცხადა მან ჟურნალისტებთან.

15 წლის ლუკას საქმე

15 წლის ბიჭი, რომელიც დაკითხვის შემდეგ კორპუსიდან გადმოხტა 17 დეკემბერს გარდაიცვალა. ახალგაზრდა იურისტთა ასოციაციის განცხადებით, არასრულწლოვანმა თვითმკვლელობა, საგამოძიებო ორგანოს თანამშრომლების მხრიდან ფსიქოლოგიური ძალადობის გამო სცადა.

პოლიციას გამოძიების დაწყების მოთხოვნით მწვანე სკოლამ მიმართა, რომლის ტერიტორიაზეც გვიან ღამით არასრულწლოვანმა სხვადასხვა წარწერები დატოვა. გავრცელებული ინფორმაციით, ეს 15 წლის ლუკა სირაძემ გააკეთა, რომელიც მწვანე სკოლის ყოფილი მოსწავლე იყო.

საიას ინფორმაციით, დაკითხვაზე ლუკა სირაძე ყოფილ თანაკლასელს დააპირისპირეს და მასზე ფსიქოლოგიურად იძალადეს, რის შემდეგაც ის მეცხრე სართულიდან გადმოხტა. რამდენიმე დღის განმავლობაში ის კომატოზურ მდგომარეობაში იყო.

შინაგან საქმეთა სამინისტრო ამტკიცებდა, რომ ბავშვი მშობელთან ერთად გამოკითხეს და ფსიქოლოგიური ძალადობას ადგილი არ ჰქონია. მათ გამოძიება თვითმკვლელობამდე მიყვანის მუხლით დაიწყეს. გამოძიებას სწორედ ის განყოფილება აწარმოებს, სადაც არასრულწლოვანზე, სავარაუდოდ, ფსიქოლოგიურად იძალადეს.

სახელმწიფო ინსპექტორის აპარატმა კი გამოძიება სისხლის სამართლის კოდექსის 335-ე მუხლით დაიწყო, რაც ჩვენების მიცემის იძულებას გულისხმობს. მოზარდის გარდაცვალების შემდეგ ამ საქმეზე გამომძიებელი მარიანა ჩოლოიანი დააკავეს და 2 სამართალდამცავს უფლებამოსილება დროებით შეუჩერეს. ჩოლოიანი ბრალს არ აღიარებს.