თბილისში, ბოტანიკური ბაღის ტერიტორიაზე იაპონური ბაღი 250 კვ.მ ფართობზე მოეწყო და იქ იაპონური ხელოვნების ისეთი ნიმუშებია განთავსებული, როგორებიცაა: ტორიის ჭიშკარი (Torii Gate), ალისფერი ჭიშკარი, რომელიც იაპონური სილამაზის ერთ-ერთი სიმბოლოა, ტასოტოს (Tasoutou) სტილის ქვის კოშკი, რომელიც ბედნიერებისა და იღბლის მომტან სკულპტურად ითვლება. ამასთანავე, ბაღში განთავსებულია კასუგას სტილის ქვის ლამპარი (Kasuga Style stone lantern) და ტრადიციული იაპონური ალისფერი ხიდი. ბაღის ერთგვარი სიმბოლოა ფუჯის მთის სკულპტურა და ფუჯისანის ვულკანური მთის ფერდობებიდან სპეციალურად ჩამოტანილი ლავის ნაწილები, რომელიც იაპონური ბაღის უცვლელ ელემენტს წარმოადგენს.

იაპონური ბაღი თბილისში.

ფოტო: თბილისის მერია

იაპონური ბაღი თბილისში.

ფოტო: თბილისის მერია

თბილისის მერიის პრესსამსახურის ინფორმაციით, იაპონურ ბაღში ასევე დაირგო სხვადასხვა სახეობისა და ფორმის მერქნიან მცენარეთა საინტერესო ნიმუშები. მათ შორის, ნეკერჩხლების, ფიჭვების, კვიპაროსების, ნაძვის, როდოდენდრონებისა და იაპონური ალუბლის (საკურას) სხვადასხვა დეკორატიული ბუჩქი, დაიგო მწვანე საფარი.

იაპონური ბაღი თბილისში.

ფოტო: თბილისის მერია

ბაღი გაშენებულია იაპონური ბაღების ყველა პრინციპის დაცვით, მისი პროექტი ეკუთვნის იაპონურ კომპანია კოსუგის, რომლის წარმომადგენლებიც უშუალოდ ხელმძღვანელობდნენ ბაღის მოწყობის პროცესს.