საპარლამენტო უმრავლესობის წევრი, ანრი ოხანაშვილი ამერიკელი კონგრესმენების კრიტიკულ წერილზე ამბობს, რომ პარტნიორებისათვის დაზუსტებული ინფორმაციის მიწოდებაა საჭირო. მისივე თქმით, ვერავის მისცემენ უფლებას, რომ ქვეყნის განვითარებაში არეულობა შემოიტანოს.

"ყველაფერს გავაკეთებთ იმისთვის, რომ პარტნიორები საქმის კურსში ჩავაყენოთ იმ პროცესების თაობაზე, რაც ბოლო პერიოდში ვითარდებოდა. კერძოდ, რის გაკეთებას ცდილობდნენ დესტრუქციული ჯგუფები და რა ჰქონდათ ჩაფიქრებული. ჩვენი და ჩვენი პარტიონირების მიზანი ერთია, საქართველოს დემოკრატიული, მშვიდობიანი და სტაბილური განვითარება", — განაცხადა ოხანაშვილმა.

გუშინ, 16 დეკემბერს, კონგრესმენებმა ადამ კინზინგერმა და ჯერალდ ე. კონოლმა საქართველოს პრემიერ-მინისტრს, გიორგი გახარიას წერილით მიმართეს. მათ პრემიერი პროპორციულ სისტემაზე გადასვლის დაპირების შეუსრულებლობის გამო გააკრიტიკეს. მათივე წერილში აღნიშნულია, რომ გასაპროტესტებლად ქუჩაში გამოსულ ხალხს "მოძალადე ბოროტმოქმედები დაუპირისპირეს".

კონგრესმენების წერილს უპასუხა პრემიერ-მინისტრმა გიორგი გახარიამაც და განაცხადა, რომ პროპორციულ საარჩევნო სისტემასთან დაკავშირებით პარლამენტმა უკვე მიიღო გადაწყვეტილება და მის გადაწყვეტილებას კითხვის ნიშნის ქვეშ ვერავინ ვერ დააყენებს.

საგარეო საქმეთა მინისტრის დავით ზალკანიანის შეფასებით კი, ვაშინგტონამდე ბევრი ურთიერთგამომრიცხავი ინფორმაცია მიდის, მაგრამ "ჩვენი სტრატეგიული პარნიორობა ამ განცხადებით არ კნინდება".

ზალკანიანის მსგავსად, აშშ-ში საქართველოს ელჩი, დავით ბაქრაძეც ფიქრობს, პარტნიორებთან წინააღმდეგობრივი გზავნილები ჩადის, თუმცა ობიექტურ ინფორმაციას მათგან იღებენ.

კონგრესმენების კრიტიკულ წერილს გამოეხმაურა პარლამენტის თავმჯდომარე, არჩილ თალაკვაძეც, რომელმაც თქვა, რომ მათ მიერ გაჟღერებული ფაქტები ვერ გადაფარავს "საქართველოს ხელშესახებ პროგრესს".