საქართველოს პარლამენტის თავმჯდომარე, არჩილ თალაკვაძე ქიმიურ შეტევას უწოდებს პარლამენტში მძაფრი სუნის ნივთიერების გაშვებას. მან ამ შემთხვევაშიც გაავლო პარალელი "გავრილოვის ღამესთან" და იმ დღეს "ძალადობრივი შეტევა" უწოდა.

"სამწუხაროა, რომ ძალადობრივი შეტევის შემდეგ, რაც ვნახეთ ივნისში და რასაც მოჰყვა სამართლებრივი რეაგირება, დღეს უკვე ვნახეთ, სავარაუდოდ, ქიმიური შეტევა პარლამენტზე... მე პირადად არ დამინახავს, მაგრამ ფაქტია, რომ ქიმიური ნივთიერება იყო გამოყენებული სხდომათა დარბაზში, არსებობს კამერების ჩანაწერები და ამას მოჰყვება სათანადო რეაგირება, როგორც კანონმდებლობა ითვალისწინებს", — განაცხადა თალაკვაძემ.

მისი თქმით, "სათანადო შეფასება უნდა მიეცეს" #სირცხვილიას საჯარო განცხადებას, სადაც საუბარი იყო პარლამენტში სუნის გაშვებაზე პასუხისმგებლობის აღებაზე.

დღეს, 12 დეკემბერს მიმდინარე სხდომაზე, სადაც უვადო მოსამართლეების დასანიშნად კენჭისყრა უნდა გამართულიყო, შესვენება გამოცხადდა. ამის მიზეზი სხდომათა დარბაზში გაურკვეველი სითხის დაღვრა გახდა, რასაც სპეციფიკური სუნი ჰქონდა. უსაფრთხოების მიზნით, პარლამენტის თავმჯდომარემ სხდომა შეწყვიტა. ამ დროისათვის პარლამენტში სხდომა შეჩერებულია, პარლამენტის თავმჯდომარის თქმით, სხდომა 16:00 საათის შემდგომ განახლდება, თუ ამის შესაძლებლობას უსაფრთხოების სტანდარტი მისცემს.

განახლება: 12 დეკემბრის მოვლენები მოკლედ

დღეს, 12 დეკემბერს სამოქალაქო მოძრაობის აქტივისტებმა და პოლიტიკური პარტიის წარმომადგენლებმა პარლამენტის შესასვლელების პიკეტირება სცადეს, თუმცა დეპუტატები საკანონმდებლო ორგანოში მაინც შევიდნენ. აქციაზე პოლიციამ ჯამში 16 პირი დააკავა.

პარლამენტის უპარტიო დეპუტატი, ეკა ბესელია ამბობდა, რომ მოსამართლეთა არასასესიო კვირაში არჩევა პარლამენტის რეგლამენტს ეწინააღმდეგებოდა. ის რამდენიმე წუთის განმავლობაში კომიტეტის თავმჯდომარეს არ აძლევდა საშუალებას კანდიდატურები განეხილათ.

პროცესის ჩასაშლელად კენჭისყრის დაწყებამდე რამდენიმე წუთით ადრე პლენარულ სხდომათა დარბაზში გაურკვეველი ნივთიერება გაუშვეს, რამდენიმე ადამიანი ცუდად გახდა. ამ მიზეზით სხდომათა დარბაზი დაატოვებინეს დეპუტატებს და კენჭისყრამ რამდენიმე საათით გადაიწია. საქმეზე გამოძიება შსს-მ სისხლის სამართლის კოდექსის 117-ე მუხლით დაიწყო. ამ მუხლით ჯანმრთელობის განზრახ მძიმე დაზიანება მინიმუმ 3-წლიანი პატიმრობით ისჯება. ქართულმა ოცნების ერთ-ერთმა დეპუტატმა მომხდარი ტერორისტულ აქტად, დანარჩენებმა კი ქიმიურ თავდასხმად შეაფასეს. მომხდარზე პასუხისმგებლობა #სირცხვილიამ აიღო.

საბოლოოდ, კენჭისყრა მაინც ჩატარდა და ქართულმა ოცნებამ 14 მოსამართლე უზენაეს სასამართლოში უვადოდ დანიშნა.