პრეზიდენტ სალომე ზურაბიშვილის მიერ ქვეყნის სამხედრო შესაძლებლობების შეფასებას ქართული ოცნება საერთო მესიჯით პასუხობს. ზურაბიშვილის განცხადებაზე საუბრისას, სადაც ამბობს რომ "არც ჯარი გვაქვს, არც იარაღი და არც გვექნება", მმართველი გუნდი სიტყვა სიფრთხილეს ახსენებს. ასევე, ხაზს უსვამენ, რომ ქვეყანას ღირსეული ჯარი და საამაყო გმირები ჰყავს.

კახა კალაძე

ფოტო: ქართული ოცნება

კახა კალაძე — ქართული ოცნების გენერალური მდივანი

"პრეზიდენტს უფრო მეტი დაფიქრება სჭირდება, როდესაც ჯარზე საუბრობს. მით უმეტეს, როცა ის მთავარსარდალია. რა თქმა უნდა, ჩვენ გვყავს ჯარი და ღირსეული ჯარისკაცები. გვყავს გმირები, ადამიანები, რომლებიც ყველაფერს აკეთებენ იმისთვის, რომ ქვეყანა იყოს ერთიანი. სხვათა შორის, ჩვენი ჯარისკაცები არიან წარმატებულები, სხვადასხვა საერთაშორისო ღონისძიებებში მონაწილეობენ, რაც ძალიან მნიშვნელოვანია. თითოელ ჯარისკაცს, თითოეულ გმირს მინდა მადლობა გადავუხადო იმისთვის, რასაც ისინი ჩვენი ქვეყნისთვის აკეთებენ".

ფოტო: ქართული ოცნება

მამუკა მდინარაძე — უმრავლესობის ლიდერი

"შეიძლება ადამიანს სხვა რამის თქმა უნდოდეს, მაგრამ ნებისმიერ სიტყვას ყურადღება უნდა მიაქციოს, როცა ქვეყნის პრეზიდენტია. ეს ადამიანები მშვიდობისთვის იბრძვიან, მაგალითად, ავღანეთში. როცა პოლიტიკოსი ასეთ განცხადებას აკეთებს, ამ დროს მეტი სიფრთხილეა გამოსაჩენი. შეიძლება, სხვა რამეს გულისხმობდა, მაგრამ ასეთ განცხადებებს მეტი სიფრთხილით უნდა მოვეკიდოთ, რადგან საქართველოს ჰყავს საამაყო ჯარი და ჯარისკაცები".

ფოტო: ქართული ოცნება

ირაკლის სესიაშვილი — თავდაცვის კომიტეტის თავმჯდომარე

"ჩვენი ჯარი, ჩვენი ჯარისკაცები არიან ჩვენი სიამაყე, ამიტომ ყველას მინდა მოვუწოდო, რომ როდესაც საუბრობენ ჯარზე, ჩვენს ღირსეულ ჯარისკაცებსა და ოფიცრებზე, ყოველთვის მეტი სიფრთხილით მოვეკიდოთ, რამდენადაც ეს უკავშირდება ჩვენს ეროვნულ გრძნობებს".

გაიგეთ მეტი: