მას შემდეგ, რაც ბიძინა ივანიშვილის დაპირება არ შესრულდა და 40-მა დეპუტატმა პოროპორციულ საარჩევნო სისტემაზე გადასვლას ხმა არ მისცა პარლამენტის წინ აქციების ახალი ტალღა დაიწყო. ამ პროტესტმა ოპოზიციური პარტიები და სამოქალაქო საზოგადოება გააერთიანა და დღემდე აერთინებს. დაპირების შეუსრულებლობის შემდეგ ქართული ოცნება 12-მა დეპუტატმა დატოვა.

ბოლო 10 დღეში აქცია ორჯერ დაშალეს. ორჯერვე ერთი მიზეზით. ქართული ოცნების დეპუტატების სპეცრაზმმა გზა გაუხსნა. აქციის მონაწილეები წყლის ჭავლით დაშალა და ჯამში 65 ადამიანი დააკავა.

სწორედ ამ დროს მედიასთან ქართული ოცნების სახეები ამბობენ, რომ კრიზისი ნაციონალურ მოძრაობაშია. სწორედ ამ პარტიის წევრად მოიხსენებიენ ყველას, ვინც მათ აკრიტიკებს, მედიას, არასამთავრობო ორგანიზაციების, სამოქალაქო აქტივისტებსა და ნაციონალური მოძრაობის ოპონენტებსაც კი.

მამუკა მდინარაძე — ვიცე-სპიკერი

ფოტო: გვანცა ნემსაძე / On.ge

"კრიზისი აქვს მხოლოდ და მხოლოდ ნაციონალურ მოძრაობას, კუთხეში არიან, თვითონ ჩადგნენ ამ კუთხეში, ვერ გამოდიან ამ კუთხიდან და დილემიდან. იმიტომ, რომ აყენებენ ისეთ მოთხოვნებს, რომლებიც პრაქტიკულადაც, თეორიულადაც, ფორმალურადაც, კანონითაც და კონსტიტუციითაც არის შეუსრულებელი და ეს ნიშნავს მხოლოდ ერთს, რომ მათ სურთ პროცესის ქუჩაში გადატანა, რაც არ გამოუდით, იმიტომ რომ ხალხი არ უჭერს მხარს. სამწუხაროდ, ქუჩაში ვითარდება ძალიან ცუდი პროცესი, თუმცა ეს პროცესი არის მილევადი, ისევე როგორც ნაციონალური მოძრაობა".

კახა კალაძე — ქართული ოცნების გენერალური მდივანი

ფოტო: კახა კალაძე / FB

"პოლიტიკური კრიზისი აქვს ოპოზიციას, იმ კონკრეტულ პარტიებს, რომელიც დღეს ეწევა დესტრუქციულ ქმედებებს, მათ ნამდვილად აქვთ პოლიტიკური კრიზისი. ჩემთვის არ არის მიღებული დესტრუქციული ქმედებები. მე ვფიქრობ, რომ კონსტრუქციულობა არის მნიშვნელოვანი ისევ და ისევ ჩვენი ქვეყნის ინტერესებიდან გამომდინარე. ქვეყნის განვითარებისთვის, ქვეყნის წინსვლისთვის, კონსტრუქციულობა, მე ყოველთვის ხაზს ვუსვამდი და დღესაც, ხვალაც, ზეგაც, მაზეგ მექნება ეს დამოკიდებულება", — თქვა კახი კალაძემ.

ირაკლი კობახიძე — პარლამენტის ყოფილი თავმჯდომარე

ფოტო: საქართველოს პარლამენტი

"პოლიტიკური კრიზისი არის ნაციონალურ მოძრაობაში, ისინი ებრძვიან საკუთარ კრიზისს, საკუთარ რიგებში კრიზისიდან გამოსავალი ნაციონალურმა მოძრაობამ თვითონ უნდა იპოვოს. არ ვიცი მოძებნიან თუ არა ამ კრიზისიდან გამოსავალს, თუმცა მემგონი ძალისხმევა სჭირდებათ ამისათვის".