მედიაში გავრცელებული ინფორმაციის თანახმად, დისნეი აპირებს, რომ საკულტო საშობაო ფილმის, Home Alone-ის რიმეიქი გადაიღოს.

უკვე ცნობილია სამსახიობო გუნდის სამი წევრიც: არჩი იეიტსი, ელი კემპერი და რობ დელეინი. ჯერ-ჯერობით დაზუსტებული არ არის, თუ ვის როლებს შეასრულებენ ისინი, მაგრამ გავრცელებული ინფორმაციის თანახმად, ჰოლივუდის პატარა ვარსკვლავი, არჩი იეიტსი, რომელიც ცოტა ხნის წინ გამოჩნდა ფილმში Jojo Rabbit, არ იქნება მთავარი გმირის, კევინ მაკკალისტერის როლის შემსრულებელი და ის ახალი პერსონაჟის სახით მოგვევლინება ჩვენთვის ნაცნობ ისტორიაში.

არჩი იეიტსი, ელი კემპერი და რობ დელეინი

ფოტო: REX/SHUTTERSTOCK

პირვანდელ ფილმში, რომელიც 1990 წელს გადაიღეს, მთავარ როლს მსახიობი მაკოლეი კალკინი ასრულებს, რომლის გმირიც მთელ მსოფლიოში შეიყვარეს — შობაზე სახლში მარტო დარჩენილი მოზარდის თავგადასავალი ყველა დროის ერთ-ერთ ყველაზე პოპულარულ ფილმად ითვლება.

როგორც ამბობენ, ახალ ფილმში განსხვავებულ ისტორიებს, პერსონაჟებსა და ფათერაკებს უნდა ველოდოთ. რადგანაც ჯერ გადაღებებიც კი არ დაწყებულა, ისღა დაგვრჩენია მოთმინება ვიქონიოთ და ჩვენი საყვარელი ისტორიის ხელახლა გაცოცხლებას დაველოდოთ.