პარლამენტში უმრავლესობის მაჟორიტარი დეპუტატი, სიმონ ნოზაძე აცხადებს, რომ მისთვის სრულად მაჟორიტარული სისტემა მიუღებელია. ამის მიზეზად კი ის ამბობს, რომ ახალგაზრდა პოლიტიკოსების აღზრდა ვერ მოხერხდება.

"იმიტომ, რომ ადგილებზე, როგორც წესი, მაჟორიტარებად ირჩევენ იმათ, ვისაც გარკვეული წარსული აქვს და პოპულარობით სარგებლობს", — აღნიშნა დეპუტატმა.

მას, ასევე, მიაჩნია, რომ ინიციატივა საკონსტიტუციო უმრავლესობას ვერ მოიპოვებს.

დღეს, 6 დეკემბერი ქართული ოცნების ოფისში უმრავლესობის სხდომა უნდა გაიმართოს. სავარაუდოდ, პარტიის წევრებმა დეპუტატ დიმიტრი ხუნდაძის ინიციატივა უნდა განიხილონ, რომელიც სრულად მაჟორიტარულ სისტემაზე გადასვლას ეხება.

პროპორციული საარჩევნო სისტემის ჩაგდების შემდეგ, კანონპროექტის მოწინააღმდეგე მმართველი პარტიის დეპუტატმა, დიმიტრი ხუნდაძემ სრულად მაჟორიტარულ სისტემაზე გადასვლის ინიციატივა გამოთქვა. მიუხედავად იმისა, რომ უმრავლესობის ლიდერებმა ინიციატივა დაიწუნეს, ხუნდაძემ პარლამენტში საინიციატივო ჯგუფი უკვე დაარეგისტრირა. გარდა ამისა, დეპუტატმა გამოთქვა იდეა, რომ ორპალატიანი პარლამენტი შეიქმნას. ხუნდაძემ აღნიშნა, რომ ეს ინიციატივა 2020 წლისთვის არ აქვს, თუმცა არ დაუკონკრეტებია, რომელი წლის არჩევნებს გულისხმობდა.