ჟურნალმა PEOPLE-მა 2019 წლის ადამიანები დაასახელა. როგორც გამოცემა წერს, რედაქტორებმა არჩევანი იმ ადამიანებზე გააკეთეს, რომლებმაც ათწლეულის ბოლო 365 დღის განმავლობაში სამყაროზე გავლენა მოახდინეს.

როგორც PEOPLE-ის მთავარმა რედაქტორმა, დენ ვეიკფორდმა განმარტა, ჟურნალმა მხოლოდ ერთი ვარსკვლავი ვერ შეარჩია და ამიტომ ოთხი ადამიანი დაასახელა წლის პერსონად:

"ამ საახალწლო დღესასწაულზე თქვენთვის საჩუქარი გვაქვს და პირველად ისტორიაში, ერთის ნაცვლად 4-ყდიან ჟურნალს გამოვუშვებთ. წლის ადამიანებით ვზეიმობთ იმ ხელოვანებს, რომლებმაც გავლენა მოახდინეს ჩვენს კულტურაზე, ინდივიდებს, რომლებმაც შეგვძრეს და გაგვახალისეს. გვსურდა გვეხილა, თუ შევძლებდით მათი სიბრძნის შესრუტვას. როდესაც დავსხედით და ამ ადამიანებზე შევჯერდით, არ გაგვკვირვებია, რომ ოთხივე ადამიანი ქალი იყო — წელს ძლიერი ქალები დომინირებდნენ".

PEOPLE-ის 2019 წლის ადამიანები არიან:

ტეილორ სვიფტი

ფოტო: MILLER MOBLEY

"იმის მიუხედავად, რომ სვიფტის მუსიკალური კარიერა 15 წელზე მეტს ითვლის, 2019 ნამდვილად ის წელია, როდესაც ტეილორ სვიფტმა თავისი ხმა იპოვა: მან საკუთარი შემოქმედებითი უფლებების დაცვა უფრო ხმამაღლა განაგრძო, გულწრფელად ისაუბრა საკუთარ შეხედულებებზე და განაგრძო მუსიკის შექმნა, რომლითაც გვაჩვენა სიბრძნე და ამბის მოყოლის გამორჩეული უნარი. აგვისტოში გამოსული მისი ალბომი Lover სულ რაღაც ერთ კვირაში 2019 წლის ყველაზე გაყიდვადი ალბომი გახდა. ეს ნამდვილად ეპიკურია".

მიშელ ობამა

ფოტო: MILLER MOBLEY

2019 წელს მიშელ ობამა ისტორიაში ყველაზე გაყიდვადი მემუარისტი გახდა, მისი წიგნის, Becoming, აუდიო ვერსია კი გრემი ნომინანტია. Gallup-ის გამოკითხვაში, მიშელ ობამა მსოფლიოს ყველაზე საყვარელ ქალად დასახელდა. ამასთან ერთად, ის აგრძელებს გოგონების განათლებაზე ზრუნვას მსოფლიო მასშტაბით.

ჯენიფერ ლოპესი

ფოტო: MILLER MOBLEY

ჯენიფერ ლოპესი 50 წლის გახდა და ახალ ფილმში, Hustlers, შესრულებული როლის გამო ოსკარის ნომინანტადაც განიხილავენ. ლოპესი ფილმის თანაპროდიუსერიცაა.

"მას ჰყავს ახალი ლამაზი ოჯახი, გამართა საოცარი მუსიკალური ტურნე და ველოდებით მის ხილვას სუპერ ბოულზე", — წერს PEOPLE.

ჯენიფერ ენისტონი

ფოტო: MILLER MOBLEY

ჯენიფერ ენისტონი მთავარ როლს ასრულებს Apple TV+-ის ერთ-ერთ ახალ სერიალში The Morning Show, რომლის თანაპროდიუსერიცაა. მისი სცენა კაცებით სავსე ოთახში, ერთ-ერთი ყველაზე ძლიერია, სადაც ის ამბობს:

"თქვენი ძალაუფლება გაქრა. ახლა ამას ისე გავაკეთებთ, როგორც მე მინდა".

ჟურნალი ამ სცენას ენისტონის კარიერაში მის ერთ-ერთ საუკეთესო შესრულებას უწოდებს.