პარლამენტში უმრავლესობის დეპუტატი, აკაკი ზოიძე, რომელიც პოლიტიკიდან მიდის ამბობს, რომ ნებისმიერ სასიკეთო საქმეში ქართულ ოცნებას მარში დაუდგება.

დღეს, 2 ოქტომბერს მმართველი პარტიის დეპუტატმა, აკაკი ზოიძემ განაცხადა, რომ ქართულ ოცნებასა და საპარლამენტო მანდატს ტოვებს. მისი თქმით, ნეგატიური პოლიტიკური დღის წესრიგისას პოზიტიური რეფორმების გატარება ნაკლებ სავარაუდოა, ამიტომ თავის ადგილს დღევანდელ საჯარო, პარტიულ პოლიტიკაში ვეღარ ხედავს.

"ორი კვირის წინ ვთქვი, რომ პრაგმატული პოლიტიკის გონებით მესმის, მაგრამ გულით არა. ხოლო უგულოდ არცერთი საქმის კეთება კარგად არ გამოსდის ადამიანს, მათ შორის პოლიტიკის. მით უმეტეს, როდესაც პოლიტიკური პროცესი მკვეთრად პოლარიზებულია, რაშიც ჩემ წილ პასუხისმგებლობასაც ვგრძნობ", — წერს ზოიძე.

მისივე თქმით, რჩება იმ ფასეულობების ერთგულად, რომლის გამოც 2016 წელს შეუერთდა პარტიას და კოლეგებსაც იმავესკენ მოუწოდებს. მისივე თქმით, მზად არის მათ გვერდში დაუდგეს ქვეყნის სასიკეთო ნებისმიერ საქმეში.

დეპუტატმა ის 3 საკანონდებლო რეფორმა დაასახელა, რომელთა შექმნაშიც თავადაც მონაწილეობდა და რომლებსაც საშვილიშვილო მონაპოვრად მიიჩნევს. ესენია: ახალი კონსტიტუცია, თამბაქოს კონტროლის კანონი და დაგროვებითი საპენსიო სისტემა.

პროპორციულ საარჩევნო სისტემაზე გადასვლის კანონპროექტის ჩაგდების შემდეგ ქართული ოცნება და საპარლამენტო უმრავლესობა 12-მა დეპუტატმა დატოვა, მათ შორის სხვადასხვა კომიტეტების თავმჯდომარეებმა. წამოსულ დეპუტატებს შორის არიან ქართული ოცნების აქტიური სახეები: თამარ ჩუგოშვილი, თამარ ხულორდავა, დიმიტრი ცქიტიშვილი, ზვიად ძიძიგური, მარიამ ჯაში.