პარლამენტის ბიბლიოთეკის მიმდებარე ტერიტორიიდან პოლიციამ ევროპული საქართველოს ლიდერი გიგი უგულავა ძალის გამოყენებით გაიყვანა. უგულავა მაშინ გაიყვანეს, როდესაც ბიბლიოთეკაში იუსტიციის მინისტრი თეა წულუკიანი შედიოდა და დაპირისპირება მოხდა.

ფოტო: ანა ვახტანგაძე / On.ge

ფოტო: ანა ვახტანგაძე / On.ge

ამ დროისთვის უცნობია ის დააკავეს, თუ განარიდეს ტერიტორიიდან. On.ge-ს ჟურნალისტმა არაერთხელ ჰკითხა პოლიციის უფროსს, ვაჟა სირაძეს ამის შესახებ, თუმცა მან კითხვებს არ უპასუხა.

ჩვენ ველოდებით პასუხს შსს-ს პრესსამსახურიდან და მიღებისთანავე შემოგთავაზებთ.

პარლამენტის ეროვნულ ბიბლიოთეკასთან საპროტესტო აქცია გრძელდება. ოპოზიციამ და სამოქალაქო აქტივისტებმა ბიბლიოთეკასთან მას შემდეგ გადმოინაცვლეს, რაც ცნობილი გახდა, რომ თეა წულუკიანი იქ შეხვედრაზე მიდიოდა. მათი თქმით, ყველგან და ყოველთვის შეუქმნიან დისკომფროტს ქართული ოცნების წევრებს. ბიბლიოთეკასთან პოლიციაა მობილიზებული.

ბოლო დღეების მოვლენები

მას შემდეგ, რაც ქართული ოცნების დეპუტატებმა პროპორციული საარჩევნო სისტემის კანონპროექტი ჩააგდეს, საქართველოს მასშტაბით სხვადასხვა ქალაქებში საპროტესტო აქციები იმართება. პროტესტის ფარგლებში პიკეტირებული იყო მთავარი საკანონმდებლო ორგანოც, რომლის შესასვლელებიც ხელისუფლებამ ორჯერ სპეცრაზმისა და წყლის ჭავლის გამოყენებით გახსნა.

აქციის დაშლის შემდეგ ოპოზიციამ და სამოქალაქო აქტივისტებმა პროტესტი ახალი ფორმა "მაინც დაგაბოქლომებთ" დაიწყეს. ისინი სხვადასხვა ადმინისტრაციულ შენობებსა და ქართული ოცნების დეპუტატების ოფისებს ბოქლომებს ადებენ.

მას შემდეგ, რაც პარლამენტის პიკეტი მესამედ დაანონსდა, ხელისუფლებამ პარლამენტის მიმდებარე ქუჩები რკინის კონსტრუქციებით ჩაკეტა. კონსტრუქციები ხელს უშლიდა მოქალაქეებს გადაადგილებაში. პოლიციამ გზები აქციის დაშლის შედეგ გაათავისუფლა.