პარლამენტის დამოუკიდებელი დეპუტატის, ბექა ნაცვლიშვილის თქმით, ყველამ იმდენი მოახერხა, რომ ახალგაზრდები ნაციონალური მოძრაობის გვერდით დგანან. ამის მიზეზი კი ისაა, რომ ქართულმა ოცნებამ პროგრესი ვერ აჩვენა.

"ჩვენ იმდენი მოვახერხეთ, რომ ახალგაზრდები დგანან, ჩვეულებრივი ახალგაზრდები, არცერთ პარტიას რომ არ განეკუთვნებიან, გულწრფელად რომ რაღაცისთვის იბრძვიან, ის ახალგაზრდებიც კი დგანან რუსთაველზე ნაციონალურ მოძრაობასთან ერთად... პრობლემა რაშია იცით, ნაციონალური მოძრაობა გახდა, სამწუხაროდ, მთავარი ტრაგედია ამ ქვეყნისთვის, ეს ბავშვები პატარები არიან, არც მოსწრებიან ამას. მაგრამ პროგრესსაც ვერ მოესწრნენ, რადგან ქართულმა ოცნებამ ვერ ანახა, რომ ის არის პროგრესული პარტია", — თქვა ბექა ნაცვლიშვილმა.

ამ სიტყვებით დეპუტატმა კოლეგებს პარლამენტის პლენარულ სხდომაზე მიმართა. მან თქვა, რომ გარეთ შეკრებილი ახალგაზრდები რეალურ ცვლილებებს ითხოვენ. ბექა ნაცვლიშვილმა ქართული ოცნება მას შემდეგ დატოვა, რაც პარლამენტმა საპენსიო სისტემაზე მისი ალტერნატიული საკანონმდებლო პაკეტი ჩააგდო.

დღეს, 26 ნოემბერს, გამთენიისას პარლამენტთან შეკრებილი აქტივისტები, ისევ სპეცრაზმისა და წყლის ჭავლის გამოყენებით დაშალეს. გასული 12 საათის განმავლობაში პოლიცია აქციის მონაწილეებს ხელს უშლიდა და ართმევდა შეშას და რკინის კასრებს, რომლითაც მათ ღამით გათბობა სურდათ. შინაგან საქმეთა სამინისტროს პრესსამსახურის ვერსიით, ეს იყო კანონის მოთხოვნების შესრულება. ამ შეზღუდვას გამოეხმაურა სახალხო დამცველიც. მან განმარტა, რომ მსგავსი შეზღუდვა კანონიერი არაა.

ბოლო რამდენიმე საათის განმავლობაში დაკავებულების რაოდენობა უცნობია. On.ge ამ მონაცემების გადამოწმებას უშედეგოდ ცდილობს. იმის მიუხედავად, რომ სამართალდამცავებმა პარლამენტის ორი დეპუტატი წაიყვანეს, შსს-ს ვერსიით, ეს დაკავება არ იყო. ახლა გიგა ბოკერიაც და თენგიზ გუნავაც თავისუფალია.

ბოლო დღეების მოვლენები

მას შემდეგ, რაც ქართული ოცნების დეპუტატებმა პროპორციული საარჩევნო სისტემის კანონპროექტი ჩააგდეს, საქართველოს მასშტაბით სხვადასხვა ქალაქებში საპროტესტო აქციები იმართება. პროტესტის ფარგლებში პიკეტირებული იყო მთავარი საკანონმდებლო ორგანოც, რომლის შესასვლელებიც ხელისუფლებამ სპეცრაზმისა და წყლის ჭავლის გამოყენებით გახსნა.

აქციის დაშლის შემდეგ ოპოზიციამ და სამოქალაქო აქტივისტებმა პროტესტი ახალი ფორმა "მაინც დაგაბოქლომებთ" დაიწყეს. ისინი სხვადასხვა ადმინისტრაციულ შენობებს ბოქლომებს ადებენ. პროტესტის მონაწილეებმა სიმბოლურად უკვე "დააბოქლომეს" პროკურატურა, სახელმწიფო უსაფრთხოების სამსახური, მთავრობის კანცელარია. ასევე, ისინი ბოქლომს ადებენ მაჟორიტარი დეპუტატების ოლქებს.

ოპოზიციამ და მათმა მხარდამჭერებმა აჭარის უმაღლესი საბჭოს ჭიშკარზე ბოქლომი ჩამოკიდეს. გარდა ამისა, ბოქლომები დაადეს პარლამენტის თავმჯდომარის, არჩილ თალაკვაძისა და დეპუტატ მიხეილ ყაველაშვილის ბიუროს ოფისებს. "დაბოქლომებულია" ასევე მთავრობის კანცელარია, პროკურატურა და პრეზიდენტის რეზიდენცია.