ქართული ოცნების დეპუტატი თემურ ჭკუასელი აქციის მონაწილეებმა პარლამენტის შენობაში არ შეუშვეს. დეპუტატის მანქანას აქციის მონაწილეები და ოპოზიციური პარტიის წევრები გადაეღობნენ. თემურ ჭკუასელმა ჟურნალისტის კითხვას, მოსწონს თუ არა, რომ ძალადობრივად დაშლილი აქციის შემდეგ უწევს პარლამენტში შესვლა უპასუხა, რომ არ მოსწონს, მაგრამ სამსახურში მივიდა.

"ძალადობა არასდროს არ არის კარგი, არც იქით არც აქეთ, მაგაზე რა გითხრათ, კარგი-მეთქი გეტყვით?!... ეს კარგია? მე რამე დავაშავე?! გეკითხებით. ამას ვაპროტესტებ, რაც ახლა ხდება, ძალადობა არ მომწონს არსად და ესეც ძალადობაა", — თქვა თემურ ჭკუასელმა მედიასთან საუბრისას.

დეპუტატმა ტერიტორია შეძახილების ფონზე, პოლიციის კორდონის დახმარებით დატოვა. პარლამენტთან მისასვლელი ყველა ქუჩა ჩაკეტილია, ჩიტაძისა და ჭიჭინაძის ქუჩები ყვითელი ავტობუსებითაა გადაკეტილი.

დღეს, 26 ნოემბერს, პარლამენტთან შეკრებილი აქტივისტები, ისევ სპეცრაზმისა და წყლის ჭავლის გამოყენებით დაშალეს. ამჟამად პარლამენტთან, ჭიჭინაძის ქუჩა გადაკეტილი პოლიციის მიერ. გზა ყვითელი ავტობუსითაა ჩახერგილი. საკანონმდებლო ორგანოში არასაპარლამენტო ოპოზიციის წევრებს არ უშვებენ.

გასული 12 საათის განმავლობაში პოლიცია აქციის მონაწილეებს ხელს უშლიდა და ართმევდა შეშას და რკინის კასრებს, რომლითაც მათ ღამით გათბობა სურდათ. შინაგან საქმეთა სამინისტროს პრესსამსახურის ვერსიით, ეს იყო კანონის მოთხოვნების შესრულება. ამ შეზღუდვას გამოეხმაურა სახალხო დამცველიც. მან განმარტა, რომ მსგავსი შეზღუდვა კანონიერი არაა.

ბოლო რამდენიმე საათის განმავლობაში დაკავებულების რაოდენობა უცნობია. On.ge ამ მონაცემების გადამოწმებას უშედეგოდ ცდილობს. იმის მიუხედავად, რომ სამართალდამცავებმა პარლამენტის ორი დეპუტატი წაიყვანეს, შსს-ს ვერსიით, ეს დაკავება არ იყო. ახლა გიგა ბოკერიაც და თენგიზ გუნავაც თავისუფალია.

ბოლო დღეების მოვლენები

მას შემდეგ, რაც ქართული ოცნების დეპუტატებმა პროპორციული საარჩევნო სისტემის კანონპროექტი ჩააგდეს, საქართველოს მასშტაბით სხვადასხვა ქალაქებში საპროტესტო აქციები იმართება. პროტესტის ფარგლებში პიკეტირებული იყო მთავარი საკანონმდებლო ორგანოც, რომლის შესასვლელებიც ხელისუფლებამ სპეცრაზმისა და წყლის ჭავლის გამოყენებით გახსნა.

აქციის დაშლის შემდეგ ოპოზიციამ და სამოქალაქო აქტივისტებმა პროტესტი ახალი ფორმა "მაინც დაგაბოქლომებთ" დაიწყეს. ისინი სხვადასხვა ადმინისტრაციულ შენობებს ბოქლომებს ადებენ. პროტესტის მონაწილეებმა სიმბოლურად უკვე "დააბოქლომეს" პროკურატურა, სახელმწიფო უსაფრთხოების სამსახური, მთავრობის კანცელარია. ასევე, ისინი ბოქლომს ადებენ მაჟორიტარი დეპუტატების ოლქებს.

ოპოზიციამ და მათმა მხარდამჭერებმა აჭარის უმაღლესი საბჭოს ჭიშკარზე ბოქლომი ჩამოკიდეს. გარდა ამისა, ბოქლომები დაადეს პარლამენტის თავმჯდომარის, არჩილ თალაკვაძისა და დეპუტატ მიხეილ ყაველაშვილის ბიუროს ოფისებს. "დაბოქლომებულია" ასევე მთავრობის კანცელარია, პროკურატურა და პრეზიდენტის რეზიდენცია.