პარლამენტის საპროცედურო საკითხთა კომიტეტის თავმჯდომარის, გიორგი კახიანის განცხადებით, ხვალ, 26 ნოემბრის დაგეგმილი პლენარული სხდომა აქციის მიუხედევად ჩატარდება. მისივე თქმით, მიმდინარე "დაბოქლომების" აქციებმა არასერიოზული სახე მიიღო და პარლამენტისთვის ფუნქციონირების ხელშეშლის შემთხვევაში, პროპორციულ ძალას მიმართავს სახელმწიფოს.

"პროტესტის მათი უფლებაა, მათ ამის საშუალება ექნებათ. პირიქით, სახელმწიფო ვალდებულია, აზრის გამოხატვის თავისუფლება უზრუნველყოს, მაგრამ ამ შემთხვევაში ერთადერთი პირობაა - კანონი არ უნდა დაირღვეს.

თუ პარლამენტის ფუნქციონირებას საფრთხე შეექმნება, იქნება ეს საპროტესტო აქცია თუ სხვა, ბოქლომის დადებას აპირებენ, თუ რასაც აპირებენ, არასერიოზული სახე მიიღო ამან ჩემი აზრით. სახელმწიფოს რეაგირება იქნება პროპორციული, როგორც წინა შემთხვევაში გამოჩნდა... ოპოზიციას ვთხოვდი, ასეთი მოქმედებბეისგან თავი შეიკავონ. სხდომაზე მოვიდნენ და სჯობს, პოლიტიკური დებატები გავმართოთ", — ამბობს ის.

მას შემდეგ, რაც ქართული ოცნების ე.წ. აჯანყებულმა დეპუტატებმა ჩააგდეს საკონსტიტუციო ცვლილებების პროექტი, რომლითაც ქვეყანაში 2020 წლის არჩევნები სრულად პროპორციული წესით უნდა ჩატარებულიყო, ოპოზიციისა და სამოქალაქო აქტივისტების საერთო პროტესტი დაიწყო. დაპირისპირებული ოპოზიციური ჯგუფები ერთი მოთხოვნის ირგვლივ გააერთიადნენ — ვადამდელი არჩევნების პროპორციული სისტემითა და ე.წ. გერმანული მოდელით ჩატარება.

პროტესტის ფარგლებში პიკეტირებული იყო მთავარი საკანონმდებლო ორგანო, რომლის შესასვლელებიც ხელისუფლებამ სპეცრაზმისა და წყლის ჭავლის გამოყენებით გახსნა. აქციის დაშლის შემდეგ დააკავეს 37 აქტივისტი, მათ ნაწილს ადმინისტრაციული პატიმრობა შეუფარდეს.

ოპოზიციამ და სამოქალაქო აქტივისტებმა პროტესტი ახალი ფორმა "მაინც დაგაბოქლომებთ" დაიწყეს. პროტესტის მონაწილეებმა სიმბოლურად უკვე "დააბოქლომეს" პროკურატურა, სახელმწიფო უსაფრთხოების სამსახური, მთავრობის კანცელარია, პრეზიდენტის ადმინისტრაცია და მმართველი პარტიის დეპუტატების ოფისები და ოლქები.

პროპორციულ სისტემაზე გადასვლის პირობა ბიძინა ივანიშვილმა დადო, როდესაც 20-21 ივნისს განვითარებული მოვლენების გამო პროტესტი დაიწყო. პროპორციული სისტემა აქცია #სირცხვილიას მთავარი მოთხოვნა იყო.