ევროპული საქართველოს წევრებს ქართული ოცნების მხარდამჭერები მამუკა მდინარაძის ოფისზე ბოქლომს არ ადებინებენ. ადგილზე მობილიზებულია პოლიცია.

"ქართულმა ოცნებამ მატყუარების დარაჯად გადააქცია პოლიციელები.. მატყუარებს ყველგან შეექმნებათ დისკომფორტი" — განაცხადა სერგო რატიანმა.

"გაგიშვებთ პოლიტიკურ სამარეში" — ასე პასუხობს ერთი პირი ოპოზიციას. ის აპროტესტებს იმ ფაქტს, რომ მდინარაძემ პროპორციული საარჩევნო სისტემის კანონპროექტს მხარი დაუჭირა და მის ოფისს ბოქლომს არ უნდა ადებდნენ. ასევე, ის ოპოზიციას ე.წ. ცხრაწლიან რეჟიმს ახსენებს.

სერგო რატიანის განცხადებით, დღეს თუ არა სხვა დროს ყველა "მატყუარის" ოფისს ბოქლომი აუცილებლად დაედება.

"მაინც დაგაბოქლომებთ"

მას შემდეგ, რაც ქართული ოცნების დეპუტატებმა პროპორციული საარჩევნო სისტემის კანონპროექტი ჩააგდეს, საქართველოს მასშტაბით სხვადასხვა ქალაქებში საპროტესტო აქციები იმართება. პროტესტის ფარგლებში პიკეტირებული იყო მთავარი საკანონმდებლო ორგანოც, რომლის შესასვლელებიც ხელისუფლებამ სპეცრაზმისა და წყლის ჭავლის გამოყენებით გახსნა.

აქციის დაშლის შემდეგ ოპოზიციამ და სამოქალაქო აქტივისტებმა პროტესტი ახალი ფორმა "მაინც დაგაბოქლომებთ" დაიწყეს. ისინი სხვადასხვა ადმინისტრაციულ შენობებს ბოქლომებს ადებენ. პროტესტის მონაწილეებმა სიმბოლურად უკვე "დააბოქლომეს" პროკურატურა, სახელმწიფო უსაფრთხოების სამსახური, მთავრობის კანცელარია. ასევე, ისინი ბოქლომს ადებენ მაჟორიტარი დეპუტატების ოლქებს.

ამავე თემაზე: