მამუკა მდინარაძის ოფისის "დაბოქლომების" დროს ევროპული საქართველოს დეპუტატს, სერგო რატიანს ფიზიკური და სიტყვიერი შეურაცხყოფა მიაყენეს. ფაქტი, რომელსაც პოლიციის თანამშრომლები ხედავდნენ, მთავარი არხის ოპერატორმა გადაიღო, თუმცა დაკავებული არავინ არის.

"მე აქ ახლა რასაც ვუყურებ, ორივე მხარე ერთმანეთს აყენებს შეურაცხყოფას და სიტუაციიდან გამომდინარე ვიმოქმედებთ", — უთხრა ადგილზე მყოფმა შინაგან საქმეთა სამინისტროს თანამშრომელმა პარლამენტის დეპუტატს, ირმა ნადირაშვილმა.

იმის მიუხედავად, რომ პოლიციელებმა თავად დაინახეს ძალადობის ფაქტი, შინაგან საქმეთა სამინისტროში აცხადებენ, რომ შესაძლო ამ საქმის გამოძიება დაიწყონ, მანამდე კი საქმის გარემოებები უნდა შეისწავლონ.

მას შემდეგ, რაც ქართული ოცნების დეპუტატებმა პროპორციული საარჩევნო სისტემის კანონპროექტი ჩააგდეს, საქართველოს მასშტაბით სხვადასხვა ქალაქებში საპროტესტო აქციები იმართება. პროტესტის ფარგლებში პიკეტირებული იყო მთავარი საკანონმდებლო ორგანოც, რომლის შესასვლელებიც ხელისუფლებამ სპეცრაზმისა და წყლის ჭავლის გამოყენებით გახსნა.

აქციის დაშლის შემდეგ ოპოზიციამ და სამოქალაქო აქტივისტებმა პროტესტი ახალი ფორმა "მაინც დაგაბოქლომებთ" დაიწყეს. ისინი სხვადასხვა ადმინისტრაციულ შენობებს ბოქლომებს ადებენ. პროტესტის მონაწილეებმა სიმბოლურად უკვე "დააბოქლომეს" პროკურატურა, სახელმწიფო უსაფრთხოების სამსახური, მთავრობის კანცელარია. ასევე, ისინი "აბოქლომებენ" მაჟორიტარი დეპუტატების ოლქებს.