სამართალდამცავთა რეფორმირების ცენტრის ხელმძღვანელმა, ზვიად კუპრავამ, რომელსაც სასამართლოს უპატივცემულობის ბრალდებით 9-თვიანი პატიმრობა ჰქონდა მისჯილი, საპატიმრო დაწესებულება დატოვა.

"პირველი რასაც გავაკეთებ, პირველივე აქციაზე წავალ და ვეცდები შევქმნა ბრძოლის სხვანაირი ფრონტი", — განაცხადა კუპრავამ.

გამოძიება კუპრავას 2018 წლის 11 ივნისს სასამართლოს შენობაში მოსამართლისთვის სიტყვიერი შეურაცხყოფის მიყენებას ედავებოდა. სწორედ ამიტომ წარედგინას მას ბრალი სისხლის სამართლის კოდექსის 366-ე მუხლით.

ამისთვის კუპრავას აღკვეთის ღონისძიების სახით გირაო ჰქონდა შეფარდებული. გამოძიება აცხადებდა, რომ გირაოს ქვეშ მყოფმა ზვიად კუპრავამ, ასევე სასამართლოს მიმდებარე ტერიტორიაზე, ფიზიკური შეურაცხყოფა მიაყენა ადვოკატს, რის გამოც მას სისხლის სამართლის კოდექსის 126-ე მუხლით (ძალადობა) წარედგინა ბრალი დაუსწრებლად, ვინაიდან მან თავი აარიდა სამართალდამცავ ორგანოში გამოცხადებას.

გირაოს პირობების დარღვევის, ახალი დანაშაულის შესაძლო ჩადენის, სამართალდამცავ ორგანოში არგამოცხადების, მართლმსაჯულებისთვის თავის არიდების ბრალდებით, სასამართლოს გადაწყვეტილებით მიმდინარე წლის 21 თებერვალს ზვიად კუპრავას გირაო შეეცვალა უფრო მკაცრი აღკვეთის ღონისძიებით — პატიმრობით.