საქართველოში ტურიზმის განსავითარებლად იუმორინას შემოქმედებითი ჯგუფი ბიუჯეტიდან 350 ათასი ლარით დაფინანსდა. ეს თანხა გასულ წელს Check in Georgia-ს ფარგლებში მიუზიკლ ჩხიკვთა ქორწილის ჩატარებას მოხმარდა. ღონისძიება 2018 წლის 28 აგვიტოს Black Sea Arena-ზე გაიმართა.

ხელშეკრულების თანახმად, მიუზიკლის შემოქმედებითი ჯგუფის ანაზღაურება 2 000-დან 15 000-ლარამდე მერყეობდა. მონაწილე მსახიობთა ჰონორარი კი 500-დან 3 000 ლარამდე. ყველაზე მაღალანაზღაურებადი არწივის როლის შემსრულებელი იყო, რომელსაც 3 000 ლარი გადაუხადეს, ყველაზე ნაკლები (500 ლარი) კი ბარტყის როლის შემსრულებელს მისცეს.

2018 წლის ღონისძიებების ორგანიზებისთვის ეკონომიკის სამინისტრომ Black Sea Arena-ს 20 მილიონი ლარი გამოუყო. აღნიშნული თანხა პროექტ Check in Georgia-ს ფარგლებში ჩატარებულ ღონისძიებებს უნდა მოხმარებოდა, რომელშიც, ძირითადად, ქართველი მონაწილეები მიიღებდნენ მონაწილეობას. ასე მოხდა ჩხიკვთა ქორწილის შემთხვევაშიც.

ეს პირველი შემთხვევა არ არის, როცა იუმორინას შემოქმედებითი ჯგუფი ბიუჯეტიდან ფინანსდება. ასე იყო წინა და მოქმედი ხელისუფლების დროსაც. იუმორინას შემქმნელებმა 2009-2016 წლებში თბილისის ბიუჯეტიდან 322 ათასი ლარი მიიღეს.