მმართველი გუნდიდან წასული დეპუტატები თამარ ჩუგოშვილი, თამარ ხულორდავა, ირინა ფრუიძე და დიმიტრი ცქიტიშვილი საერთო განცხადებას ავრცელებენ და ადასტურებენ რომ პოზიცია არ შეუცვლიათ. დეპუტატები განმარტავენ, რომ დღეს ქართული ოცნების ლიდერებს გადაწყვეტილების გასაცნობად შეხვდნენ.

"ჩვენ სამი წელია ვართ “ქართული ოცნების” წევრები და ბუნებრივია, დღეს, პირველ რიგში, საჭიროდ ჩავთვალეთ, ჩვენი ყოფილი გუნდის ლიდერებისთვის საბოლოო გადაწყვეტილების გაცნობა", — აცხადებენ ისინი.

მათი თქმით, ოფიციალური განცხადებით პარლამენტს ორშაბათს მიმართავენ. რაც შეეხება შემდგომ ნაბიჯებს მათივე თქმით, განცხადებას უახლოეს მომავალში გაავრცელებენ.

მას შემდეგ, რაც პარლამენტმა პროპორციული საარჩევნო სისტემის კანონპროექტი ჩააგდო დიმიტრი ცქიტიშვილმა, თამარ ჩუგოშვილმა, თამარ ხულორდავამ, სოფო ქაცარავამ, გიორგი მოსიძემ, ირინა ფრუიძემ და ზაზა ხუციშვილმა საპარლამენტო უმრავლესობა, ქართული ოცნება და თანამდებობები დატოვეს.

მოგვიანებით ამავე მიზეზით უმრავლესობა დატოვეს მარიამ ჯაშმა, გიორგი ბეგაძემ, ზვიად ძიძიგურმა, ნინო გოგუაძემ და გიგა ბუკიამ.