პატრიოტთა ალიანსი დამოუკიდებელ, უწყვეტ საპროტესტო აქციებს იწყებს. ამის შესახებ პარტიის ლიდერმა, ირმა ინაშვილმა ბრიფინგზე განაცხადა. ინაშვილის პარტია, სავარაუდოდ, არ შეუერთდება რუსთველის გამზირზე დღეს დაგეგმილ აქციას. ის არ იმყოფებოდა ოპოზიციის საერთო შეხვედრაზეც.

ინაშვილის თქმით, პირველი აქცია კვირას, 17 ნოემბერს, რესპუბლიკის მოედანზე გაიმართება და მთავარი მოთხოვნა იქნება, ქართულმა ოცნებამ დატოვოს ხელისუფლება.

"ჩვენ ამ ვითარებაში გადავდივართ უწყვეტ საპროტესტო აქციებზე", — თქვა ინაშვილმა.

დღეს, 14 ნოემბერს ბიძინა ივანიშვილის დაპირება არ შესრულდა. ქართულმა ოცნებამ მხარი არ დაუჭირა კანონპროექტს, რომლითაც ქვეყანაში 2020 წლის არჩევნები სრულად პროპორციული სისტემით უნდა ჩატარებულიყო. კანონპროექტის ჩაგდების შემდეგ გადაიკეტა რუსთაველის გამზირი და დაიგეგმა აქცია პარლამენტის წინ.