ქართული ოცნების დეპუტატი, ზაზა ხუციშვილი აცხადებს, რომ მმართველი გუნდისთვის არ იქნება კარგი, თუ პროპორციული საარჩევნო სისტემის პროექტს ოპოზიცია ხმას მისცემს, ხოლო პარტიის წევრები — არა.

დღეს, 13 ნოემბერს ქართული ოცნების ოფისში უმრავლესობის სხდომა მიმდინარეობს. მათ პროპორციულ საარჩევნო სისტემაზე გადასვლა უნდა განიხილონ.

ზაზა ხუციშვილი ამბობს, რომ იდეალური საარჩევნო სისტემა არ არსებობს, თუმცა არსებულზე დარჩენის შემთხვევაში სტაბილურობის განცდა "შეიძლება საკმაოდ შერყეული იყოს".

"მე ვფიქრობ, რომ გავა პროექტი. რისკებზე დასმული შეკითხვა არ ნიშნავს, რომ ეს დეპუტატები ხმას არ აძლევენ... გუნდი ახლა გადაწყვეტილებას ვერ შეცვლის, ეს წარმოუდგენლად მიმაჩნია", — განაცხადა ხუციშვილმა ჟურნალისტებთან.

პარლამენტს პროპორციული საარჩევნო სისტემისთვის პირველი მოსმენით კენჭი 12 ნოემბერს უნდა ეყარა, თუმცა კენჭისყრა გადაიდო. სავარაუდოდ კენჭისყრა დღეს გაიმართება.

საკონსტიტუციო ცვლილებას მხარს უჭერდნენ ნაციონალური მოძრაობა, ევროპული საქართველო და პატრიოტთა ალიანსი. ცვლილებას ეწინააღმდეგებოდა ქართული ოცნების რამდენიმე მაჟორიტარი დეპუტატი. უმრავლესობის ზოგიერთი წარმომადგენელი კენჭისყრის გადადებას ითხოვდა.

საპარლამენტო უმრავლესობის მიერ მომზადებული პროექტი 2020 წლის საპარლამენტო არჩევნების პროპორციული სისტემითა და ნულოვანი ბარიერით ჩატარებას ითვალისწინებს. კერძოდ, პოლიტიკური სუბიექტის მანდატების რაოდენობის დასადგენად, პარტიის მიერ მიღებული ხმების რაოდენობა 150-ზე გამრავლდება და არჩევნებში მონაწილე ყველა პოლიტიკური ძალის მიერ მიღებული ხმების ჯამზე გაიყოფა. არჩევნები ნულოვანი ბარიერის პირობებში ჩატარდება. ასევე, ახალი პროექტი საარჩევნო ბლოკების მონაწილეობის შესაძლებლობას არ ითვალისწინებს.

პროპორციული საარჩევნო სისტემა ერთ-ერთი მთავარი მოთხოვნა იყო, რომელიც მოძრაობა #სირცხვილიამ წამუყენა ხელისუფლებას მას შემდეგ, რაც რუსი დეპუტატის, სერგეი გავრილოვის ვიზიტის გამო აქციები დაიწყო. პროტესტის მეხუთე დღეს მმართველ გუნდს დათმობაზე მოუწია წასვლა. პარტიის ლიდერმა, ბიძინა ივანიშვილმა საზოგადოებას ამცნო, რომ 2020 წელს არჩევნებს პროპორციული სისტემითა და ნულოვანი ბარიერით ჩაატარებდნენ.

გაიგე მეტი: