პარლამენტის დამოუკიდებელმა დეპუტატმა, გედევან ფოფხაძემ პლენარულ სხდომაზე, სადაც პროპორციულ საარჩევნო სისტემას განიხილავენ, ყოფილ თანაგუნდელ ირაკლი დაჩი ბერაიას აგინა და დაემუქრა. "დავბრიდავ მაგ ნაბი*ვარს და დასრულდება მაგით" — განაცხადა ფოფხაძემ.

დეპუტატებს შორის კამათი ფოფხაძის იმ განცხადებას მოყვა, რომ უმრავლესობამ უნდა იგრძნოს თავისი პასუხისმგებლობა საპატრიარქოსთან დაწყებული ბრძოლის გამო. ამის არგუმენტებად მან საზოგადოებრივი მაუწყებლის ბორდში ნინია კაკაბაძის არჩევა და მარიხუანის კულტივაციის კანონპროექტი მოიყვანა.

ამის შემდეგ კადრებში ჩანს, რომ ფოფხაძეს საუბარს ბერაია აწყვეტინებს, რაც ხელების შლაში და ყვირილში გადადის. პარლამენტის თავმჯდომარის მოწოდებით, მანდატურებმა დეპუტატების დაშოშმინება სცადეს, თუმცა უშედეგოდ.

ამის შემდეგ გედევან ფოფხაძე რამდენიმე წუთით, სავარაუდოდ, დარბაზიდან გადის, თუმცა მალევე ბრუნდება. ამ დროს პარლამენტში ისმის დეპუტატი ქალის მიმართავა: "მაგათ ნდომებია კონსტიტუციის ჩაგდება", რაზეც პასუხად ისმის გედევან ფოფხაძის ხმა: "ყ*ეზე მკიდია თქვენი კონსტიტუცია, გამოვიდეს გარეთ".

ფოფხაძის ამ რეპლიკას პარლამენტში სიცილი მოყვა, რაც მალევე ისევ ყვირილში გადაიზარდა.

"რას მებლატავები" — იძახდა ბერაია, რაზეც ფოფხაძე პასუხობდა: "გებლატავები კი არა, გამოდით გარეთ". ამის შემდეგ კი ფოფხაძემ რამდენჯერმე განაცხადა, რომ ბერაიას "დაბრიდავდა".

დღეს, 12 ნოემბერს პარლამენტში პროპორციულ საარჩევნო სისტემას განიხილავენ. საპარლამენტო უმრავლესობის მიერ მომზადებული პროექტი 2020 წლის საპარლამენტო არჩევნების პროპორციული სისტემით ჩატარებას ითვალისწინებს. კერძოდ, პოლიტიკური სუბიექტის მანდატების რაოდენობის დასადგენად, პარტიის მიერ მიღებული ხმების რაოდენობა 150-ზე გამრავლდება და არჩევნებში მონაწილე ყველა პოლიტიკური ძალის მიერ მიღებული ხმების ჯამზე გაიყოფა. არჩევნები ნულოვანი ბარიერის პირობებში ჩატარდება. ასევე, ახალი პროექტი საარჩევნო ბლოკების მონაწილეობის შესაძლებლობას არ ითვალისწინებს.

ამავე თემაზე: