ცნობილმა ამერიკელმა მომღერალმა და მწერალმა, პატი სმიტმა, რომელიც ერთ-ერთ ყველაზე მნიშვნელოვან თანამედროვე არტისტად ითვლება, თავისი საყვარელი და ნაკლებად საყვარელი წიგნების შესახებ ისაუბრა.

წიგნი, რომელსაც ამჟამად ვკითხულობ

სულ ახლახანს დავიწყე ნონა ფერნანდესის Space Invaders-ის კითხვა. წიგნი ძალიან საინტერესო ჩანს და თანაც ის ინგლისურად შესანიშნავმა მთარგმნელმა, ნატაშა ვიმერმა თარგმნა.

წიგნი, რომელმაც ჩემი ცხოვრება შეცვალა

ლუიზა მეი ოლკოტის წიგნის - პატარა ქალები - პერსონაჟმა, ჯო მარჩმა გადამაწყვეტინა, რომ სამეცნიერო ოცნებები დამევიწყებინა და მწერალი გავმხდარიყავი.

წიგნი, რომლის ავტორობასაც ვისურვებდი

კარლო კოლოდის პინოკიოს თავგადასავალი ნებისმიერი ასაკის მკითხველისთვის იდეალური წიგნია. ეს ყველასთვის საყვარელი ზღაპარი მოგვითხრობს შემოქმედებითობაზე, კეთილსა და ბოროტს შორის დაპირისპირებაზე, დანაშაულის გამოსყიდვასა და ფერისცვალებაზე. შვიდი წლის ასაკში წავიკითხე ეს წიგნი და მას შემდეგ მუდამ ვოცნებობდი, რომ რამე მსგავსის დაწერა მეც შემძლებოდა.

წიგნი, რომელმაც ყველაზე დიდი გავლენა მოახდინა ჩემს შემოქმედებაზე

ჟან ჟენეს ქურდის ჩანაწერები, რომელმაც ერთდროულად შეზავებული ავტობიოგრაფიული და პოეტური ელემენტებით ის ჟანრი მაპოვნინა, რომელსაც მთელი გულით ვეძებდი.

წიგნი, რომელიც, ჩემი აზრით, საკმარისად დაფასებული არ არის

კერი უოლესის The Blind Contessa’s New Machine განსაცვიფრებელი ტექსტია. არ ვიცი, რამდენად პოპულარულია, მაგრამ ვფიქრობ, რომ ეს წიგნი ნამდვილი საგანძურია.

წიგნი, რომელმაც ჩემი აზროვნება შეცვალა

ჰერმან ჰესეს წიგნმა რიოში მარგალიტებით თამაში ჩემი აზროვნება არ შეცვალა, თუმცა ნამდვილად გააფართოვა შემოქმედებითი ინტელექტის სრულიად ახალი დეტალების აღმოჩენით.

წიგნი, რომელზეც ბოლოს ვიტირე

შარლოტა ბრონტეს Villette-ის დასასრულმა იმდენად იმოქმედა ჩემზე, რომ ამ წიგნის ალტერნატიული დასასრული თავადაც დავწერე.

წიგნი, რომელმაც ბოლოს ბევრი მაცინა

სეზარ აირას დიდებული ნაწარმოები Artforum. ამ ავტორის ყველა წიგნი საოცარი იუმორითაა სავსე.

წიგნი, რომლის კითხვაც ვერ დავასრულე

პატარა ასაკში მარკ ტვენის უფლისწული და მათხოვარის კითხვა რომ დავიწყე, იმდენად გავნერვიულდი, რომ გული ამერია. მისი დასრულება ვერ შევძელი და ამისთვის არც ახლა ვარ მზად.

წიგნი, რომელიც წაკითხული რომ არ მაქვს, მრცხვენია

უკვე წლებია სახლში მაქვს რობეტ მუზილის უთვისებო კაცის საუცხოო სამტომიანი გამოცემა და აქამდე არ წამიკითხავს. ვფიქრობ, უკვე დადგა ამის გამოსწორების დროც.

წიგნებთან დაკავშირებული პირველი მოგონება

წიგნები იქამდე შემიყვარდა, სანამ მათ წაკითხვას შევძლებდი. თავიდანვე დარწმუნებული ვიყავი, რომ მათში რაღაც ძვირფასი ინახებოდა და როცა რობერტ ლუის სტივენსონის საბავშვო ლექსები წავიკითხე, დავრწმუნდი, რომ არ ვცდებოდი.

წიგნი, რომელსაც სხვებს ვჩუქნი

მარსელ შვობის საუცხოო ნაწარმოები The Children’s Crusade.

წიგნი, რომლითაც მინდა, რომ ვახსოვდე სხვებს

ჩემი წიგნი Woolgathering, რადგან ის ჩემს წარმოსახვას ყველაზე ზუსტად გამოხატავს.