სურსათის ეროვნულმა სააგენტომ კომპანია ბიუ-ბიუს წარმოების ქათმის ხორცში სალმონელა აღმოაჩინა. როგორც სააგენტოში ამბობენ, მათ მიმდინარე წლის 21 ოქტომბერს შეტყობინება მიიღეს, რომ რესტორანში ლუდის ქარხანა ჩემო კარგო 11 ადამიანი მოიწამლა.

განცხადებაში აღნიშნულია, რომ ლაბორატორიული კვლევის შედეგად ქათმის დამარინადებული ფილეს ნიმუშში რომლის მწარმოებელია შპს ჩირინა (ბიუ-ბიუ) და დისტრიბუტორია შპს ჯეო დისტრიბუშენ გრუპი სალმონელა გამოვლინდა.

სააგენტოს განცხადებით, შპს ჩირინასა (ფრინველთა სასაკლაო) და სადისტრიბუციო კომპანია ჯეო დისტრიბუშენ გრუპში აღებული ხუთი ნიმუშიდან ოთხში სალმონელა აღმოჩნდა. აღნიშნულ კომპანიებს დაევალათ სურსათის ბაზრიდან ამოღება და შემდგომი მოკვლევისა და რეაგირების მიზნით, საქმე შესაბამის უწყებებს გადაეცა.

მათივე თქმით, მიკრობიოლოგიური დარღვევა ასევე გამოვლინდა უკრაინული ქათმის ბარკლის ნიმუშში, რომლის მწარმოებელია Processing Complex უკრაინა, ხოლო დისტრიბუტორი შპს სანი.

ამასთანავე, 25 ოქტომბერს არაგეგმიური ინსპექტირების დროს ლუდის ქარხანა ჩემო კარგოს კრიტიკული შეუსაბამობების გამო შეუჩერა საწარმოო პროცესი. იმ მარკეტს კი, სადაც რესტორანმა შეიძინა ნედლი ქათმის ფილე, გამოვლენილი კრიტიკული შეუსაბამობების გამო შეუჩერდა საწარმოო პროცესი და 1000 ლარით დაჯარიმდა.