საპატრიარქოს საზოგადოებასთან ურთერთობის სამსახურის ხელმძღვანელი მამა ანდრია ჯაღამაიძე იმ სამ განცხადებას ასახელებს, რომლის გამოც პეტრე ცაავას მღვდელმსახურების უფლება შეუჩერეს.

"პატრიარქზე მან თქვა, რომ ის არ არის მწყემსი კეთილი და ეს ფაქტობრივად ნიშნავს, რომ ის ავაზაკია და ეს არის ძალიან დიდი შეურაცხყოფა. მან ბრძანა, რომ პატიარქს არ ეყო ღირსება, [გიორგი მამალაძის] შეწყალებაზე შუამდგომლობა დაეყენებინა და ესეც არის ძალიან დიდი შეურაცხყოფა", — განაცხადა მან ტელეკომპანია პირველის ეთერში.

გარდა ამისა, ჯაღმაიძე ამბობს, რომ იყო კიდევ ერთი მიზეზი, რომლის განხილვაც სინოდმა ვერ მოასწრო.

"როდესაც მეუფე პეტრე ჩამოვიდა თბილისში 20 ივნისის მოვლენების დროს პირდაპირ დასდო ბრალი ეპარქიას და მის ხელმძღვანელს, რომ ხალხი მაიტოვა ეკლესიამ, ქაშუეთი გამოკეტა და ყურადღება არ მიაქცია გაჭირვებაში მყოფ ადამიანებს, რომლებსაც დახმარება სჭირდებოდათ. ეს არის უხეში დარღვევა კანონიკისა — სხვის ეპარქიაში მრველის გასაგონად ასეთი განცხადებების გაკეთება", — განაცხადა მან.

მისი თქმით, სინოდის სხდომაზე პატრიარქმა ჰკითხა პეტრე ცაავას, თუ რატომ აყენებდა შეურაცხყოფას საჯარო გამოსვლებში და პასუხად მიიღო, რომ ეს არა შეურაცხყოფა, არამედ მხილება იყო. მისივე თქმით, შემდგომ ეპისკოპოსებმა ცაავას ეს მიზეზები დაუსახელეს, თუმცა განმარტებები ვერ მიიღეს.

გარდა ამისა, ანდრია ჯაღმაიძე იხსენებს პეტრე ცაავას ძველ განცხადებებს, როდესაც ის ამბობდა, რომ საპატრიარქო ცოდვის ბუდეა და პატრიარქი უუნაროა. მისი თქმით, პეტრე ცაავა სინოდის ამ სხდომამდეც გამოხატავდა აგრესიულ დამოკიდებულებას.

31 ოქტომბერს გამართული სინოდის სხდომის დასრულების შემდეგ მეუფე პეტრემ განაცხადა, რომ ეკლესიაში მამათმავლობის ცოდვის მხილების გამო ილია მეორემ მღვდელმთავრობიდან გადააყენა. მოგვიანებით კი აღნიშნა, რომ თავად პატრიარქია "პიდარასტიისა და მამათმავლობის ცოდვით შეპყრობილი".

მეუფე პეტრემ განმარტა, რომ სიტყვა "პიდარასტიაში" "ჭაბუკის გამხრწნელი" იგულისხმა. მისი თქმით, ეს საეკლესიო ტერმინია და სხვას ვერაფერს დაარქმევს.

სინოდის სხდომის განჩინებით, პეტრე ცაავას აეკრძალა მღვდელმოქმედება, გათავისუფლდა სინოდის წევრობიდან და ჭყონდიდის ეპარქიის ხელმძღვანელობიდან და "მოსანანიებლად" შიომღვიმის მონასტერში იქნა გამწესებული. მეუფე პეტრემ შიომღვიმეში წასვლაზე უარი განაცხადა და ეპარქია მის შემცვლელს გადააბარა.

მასალაში გამოყენებული მეუფე პეტრეს შეფასება გამოხატულია ჰომოფობიური სიტყვებით, თუმცა მაღალი საჯარო ინტერესიდან გამომდინარე On.ge მის სიტყვებს უცვლელად გთავაზობთ.