მაკდონალდსის გენერალური დირექტორი სტივ ისტერბრუკი თანამშრომელთან რომანტიკული ხასიათის ურთიერთობის გამო პოსტიდან გადააყენეს. კომპანიის განცხადებით, ისტერბრუკმა ფირმის წესები დაარღვია.

თავად ყოფილმა დირექტორმა, თანამშრომლებთან გაგზავნილ წერილში ინფორმაცია დაადასტურა და განაცხადა, რომ ურთიერთობა ორმხრივი სურვილის საფუძველზე მოხდა, თუმცა ასევე თქვა, რომ ეს მისი მხრიდან შეცდომა იყო:

"ახლახან, ორმხრივი შეთანხმების საფუძველზე დავიწყე ურთიერთობა თანამშრომელთან, რითიც მაკდონალდსის პოლიტიკა დავარღვიე. ეს შეცდომა იყო. კომპანიის ღირებულებებიდან გამომდინარე, ვეთანხმები ბორდის გადაწყვეტილებას, რომ ჩემი წასვლის დროა. ამის პარალელურად, იმედი მაქვს, რომ ჩემს სურვილსა და პირად სივრცეს პატივს სცემთ".

ისტერბრუკმა, რომელიც განქორწინებულია, მაკდონალდსში მუშაობა 1993 წელს ლონდონში, მენეჯერად დაიწყო. მან 2001 წელს კომპანია დატოვა და Pizza Express-ის ბოსი გახდა. 2013 წელს ის მაკდონალდსში დაბრუნდა და ჩრდილოეთ ევროპასა და დიდ ბრიტანეთში კომპანიის ხელმძღვანელი გახდა. ისტერბრუკი დირექტორის პოზიციას 2015 წლიდან იკავებდა. კომპანიიდან მისი შემოსავალი 2018 წელს $15,9 მილიონი დოლარი იყო. რაც კომპანიის თანამშრომლების საშუალო შემოსავალზე ($7 473) 2 ათასჯერ მეტია.

მაკდონალდსი ყოფილ დირექტორს კომპანიაში გამოცდილი კადრით, კრის კემპჩინსკით ანაცვლებს.