ჭყონდიდის ეპარქიის დროებითი მღვდელმთავარი, ეპარქიაში ჩასვლის პირველივე დღეს ამბობს, მას იქ განწესება არ სურდა. მისი თქმით, აფხაზეთში, სოხუმის ეპარქიის მღვდელმთავრობისთვის ემზადებოდა.

მეუფე გრიგოლი ეპარქიაში ახლახანს ჩავიდა. მას თან ახლავს სასულიერო პირების დელეგაცია.

კითხვებზე, თუ რა გეგმები და მოლოდინები აქვს, გრიგოლი პასუხობს, რომ მეუფე პეტრეს ჩაეხუტება და მადლობას გადაუხდის. რაც შეეხება სასულიერო პირების პროტესტს, რომლებიც ამბობენ, რომ მას არ დაემორჩილებიან, გრიგოლი მათ სთავაზობს, ვისაც სურს მეუფე პეტრეს გაყვეს და ვისაც არა — დარჩეს. მისი თქმით, "ურჩებს" არ დასჯის.

გუშინ, 31 ოქტომბერს სინოდის სხდომა გაიმართა, რომელიც მეუფე პეტრეს მღვდელმთავრობიდან გადაყენებით და მეუფე იაკობისთვის ტიტულის შენარჩუნებით დასრულდა. მეუფე პეტრეს დროებით შემცვლელად ეპისკოპოსი გრიგოლი დანიშნა.

სხდომის შემდეგ მეუფე პეტრემ განაცხადა, რომ ილია მეორემ ის ეკლესიაში მამათმავლობის ცოდვის მხილების გამო გადააყენა. მოგვიანებით კი მან აღნიშნა, რომ თავად პატრიარქია "პედერასტიისა და მამათმავლობის ცოდვით შეპყრობილი". მეუფემ განმარტა, რას ნიშნავს სიტყვა "პედარასტია" და პატრიარქი "ჭაბუკების გახრწნაში" დაადანაშაულა.

მასალაში გამოყენებული მეუფე პეტრეს შეფასება გამოხატულია ჰომოფობიური სიტყვებით, თუმცა მაღალი საჯარო ინტერესიდან გამომდინარე On.ge მის სიტყვებს უცვლელად გთავაზობთ.