პრემიერ-მინისტრმა, გიორგი გახარიამ პატრიარქის მიმართ მეუფე პეტრეს ბრალდება "20 ივნისის რევოლუციურ სცენარს დაუკავშირა". ამის შესახებ პრემიერმა პირველ ნოემბერს მთავრობის სხდომის დაწყების წინ განაცხადა. სხდომამდე გახარია ილია მეორეს საპატრიარქოში შეხვდა.

"რა თქმა უნდა, გარკვეული ჯგუფები, რომელთაც არ სურთ ქვეყნის წყნარი მშვიდობიანი განვითარება, ცდილობენ სხვადასხვა სახით პროვოკაციებით ზიანი მიაყენონ ჩვენი ქვეყნის ხვალინდელ დღეს. ასეთი მცდელობა ჩვენ რამდენიმე ხნის წინ ვნახეთ, როდესაც რევოლუციურ სცენარს გვიგეგმავდნენ მთავრობასთან და სახელმწიფოსთან მიმართებაში, დღეს როგორ ჩანს, გადაწყვიტეს, დესტრუქციული ქმედებებით შეიტანონ გაურკვევლობა ეკლესიაში", — განაცხადა პრემიერმა.

იმის გამო, რომ პრემიერს 20 ივნისის მოვლენები არ უხსენებია, On.ge-მ კონტექსტი მთავრობის პრესსამსახურთან გადაამოწმა.

როგორც გახარიამ თქვა, ეს სახელმწიფოსა და ეკლესიაზე მიზანმიმართული შეტევაა. მანვე აღნიშნა, რომ პატრიარქი ეკლესიისა და სახელმწიფოებრიობის სიმბოლოა.

"არავის მივცემთ უფლებას, ვერც სახელმწიფოში და ვერც ეკლესიაში მსგავსი დესტრუქციული ქმედებებით რისკის ქვეშ დააყენონ ჩვენი ხვალინდელი დღე".

გუშინ, 31 ოქტომბერს სინოდის სხდომა გაიმართა, რომელიც მეუფე პეტრეს მღვდელმთავრობიდან გადაყენებით და მეუფე იაკობისთვის ტიტულის შენარჩუნებით დასრულდა.

სხდომის შემდეგ მეუფე პეტრემ განაცხადა, რომ ილია მეორემ ის ეკლესიაში მამათმავლობის ცოდვის მხილების გამო გადააყენა. მოგვიანებით კი მან აღნიშნა, რომ თავად პატრიარქია "პედერასტიისა და მამათმავლობის ცოდვით შეპყრობილი". მეუფემ განმარტა, რას ნიშნავს სიტყვა "პედარასტია" და პატრიარქი "ჭაბუკების გახრწნაში" დაადანაშაულა.

მასალაში გამოყენებული მეუფე პეტრეს შეფასება გამოხატულია ჰომოფობიური სიტყვებით, თუმცა მაღალი საჯარო ინტერესიდან გამომდინარე On.ge მის სიტყვებს უცვლელად გთავაზობთ.