ტურისტული საქმიანობის წარმატებით წარმართვისთვის ინგლისური ენის ცოდნა რომ საჭიროა, სიახლე ნამდვილად არ არის. მით უფრო, ახლა, როცა ქართულ ტურიზმს მნიშვნელოვანი პერიოდი უდგას და ყველა ვცდილობთ, რაც შეიძლება ბევრ ადამიანს ვუთხრათ: გაატარე ოთხივე სეზონი საქართველოში.

ინგლისური ენის განსაკუთრებული საჭიროება ციფრული პლატფორმის, Lingwing-ის დირექტორმა ვატო ველიაშვილმაც დაინახა. მან ჯერ კიდევ კამპანია #SpendYourSummerInGeorgia-ს დაწყებისას გადაწყვიტა, რომ ტურისტული ბიზნესის წარმომადგენლებს, რომლებიც რეგიონებში ცხოვრობენ, ინგლისური ენის შესწავლაში დახმარებოდა და აპლიკაციაში სპეციალურად მათთვის შექმნილი, უფასო კურსი დაემატებინა. მალე ინიციატივას მხარდამჭერიც გამოუჩნდა: ტერაბანკი, რომელმაც აგვისტოდან კამპანია გახდი ტერა მოგზაური წამოიწყო და ქართულ ტურიზმს აქტიურად ეხმარება.

კურსი მთლიანად იმ ადამიანების საჭროებებზეა მორგებული, რომლებიც სტუმარ-მასპინძლობის ბიზნესში საქმიანობენ, აქვთ მცირე ან საოჯახო სასტუმროები, ჰოსტელები და ა.შ. იგი 650 დავალებას აერთიანებს და დაინტერესებულ პირებს სასაუბრო ინგლისურის გაუმჯობესებაში ძალიან მოკლე დროში ეხმარება. სულ კურსის გასავლელად 15-30 საათია საჭირო. გააჩნია, რომელ რეჟიმს აირჩევს მომხმარებელი: საფუძვლიანს, სწრაფს თუ რეაქტიულს. აპლიკაციას მესინჯერის მსგავსი ინტერფეისი აქვს და მეცადინეობისას დრო ისე სწრაფად გადის, როგორც, მაგალითად, მეგობართან საუბრისას.

კურსი სწავლების ინტერაქტიულ მეთოდს იყენებს და აქცენტს კონკრეტულად იმ ტერმინოლოგიაზე აკეთებს, რომელიც ენის შესწავლის მსურველებს ტურისტთან კომუნიკაციისთვის დასჭირდებათ. მომხმარებელი 7 სხვადასხვა ტიპის დავალებებს ასრულებს, რაც მას მასალის მარტივად და სწრაფად ათვისებაში ეხმარება. სწორად შესრულებული სავარჯიშოებისთვის იგი ქულებსაც იღებს, რაც, ცხადია, დამატებითი მოტივატორია.

აპლიკაციაში უკვე 5000-ზე მეტი მომხმარებელია ჩართული, 100-მდე ადამიანმა კი იგი დაასრულა კიდეც. Lingwing-ის დირექტორი ვარაუდობს, რომ წლის ბოლოსთვის კურსის დახმარებით ინგლისური ენის შესწავლაში 10 000-მდე მომხმარებელი ჩაერთვება, მომდევნო ზაფხულამდე კი ეს რიცხვი 30 000-ს მიაღწევს.

„ჩვენი უფასო კურსი სრულიად საკმარისია, რომ ტურიზმის სფეროში მომუშავე ადამიანებმა უცხოელ მოგზაურებთან კომუნიკაცია თავისუფლად შეძლონ და საქმიანობა კიდევ უფრო განავითარონ“, - ამბობს ვატო ველიაშვილი.

Lingwing-ის კურსი კი, ალბათ, არა მარტო ტურისტული სექტორის წარმომადგენლებისთვის, არამედ ყველა მოგზაურისთვის სასარგებლო იქნება. სცადეთ: მისი გავლა როგორც ვებგვერდის, ისე აპლიკაციის მეშვეობითაა შესაძლებელი.