განახლება: არასწორი პარკირების საფასური ჯერ არ გაიზრდება. 30 ოქტომბრის პარლამენტის სხდომაზე დეპუტატებმა კენჭი არ უყარეს კანონპროექტს, რომელიც ჯარიმის 50 ლარამდე გაზრდას ითვალისწინებს. დღეს პროექტის მესამე მოსმენა გაიმართა.

თბილისის მერის, კახა კალაძის თქმით, პარკირების გაზრდილი ჯარიმა ძალაში მას შემდეგ შევა, რაც ავტობუსები ჩანაცვლდება.

"ახალი ავტობუსებით ჩანაცვლების პროცესი, შესაძლოა, წლის ბოლომდე გაგრძელდეს ან მომავალი წლის დასაწყისამდე", — განაცხადა კალაძემ, რომელმაც რამდენიმე საათით ადრე მტკიცებითში თქვა, რომ პარკირების წესების დარღვევაზე 50 ლარამდე უკვე გაიზარდა. მერმა განაცხადა ისიც, რომ 29 ოქტომბერს პარლამენტმა შესაბამის კანონპროექტს მესამე მოსმენით დაუჭირა მხარი.

პარკირების წესების დარღვევაზე ჯარიმა 10 ლარიდან 50 ლარამდე გაიზარდა. კახა კალაძე ამბობს, რომ ჯარიმის გაზრდა თბილისის სატრანსპორტო პოლიტიკას უკავშირდება. მისივე თქმით, პარლამენტმა კანონპროექტი მერიის თხოვნით მიიღო.

გარდა ამისა, მერის განმარტებით, შეიცვალა ჯარიმის ჩაბარების წესიც. თუ აქამდე ჯარიმის ოქმი მოქალაქეს ფოსტით ეგზავნებოდა, ახლა თუ ეს ვერ მოხერხდა, ოქმი სპეციალურ ვებგვერდზე, tp.ge-ზე გამოქვეყნდება და ამის შესახებ სმს-ითაც შეატყობინებენ. მისივე თქმით, თუ დაჯარიმებული მოქალაქე 10 დღის განმავლობაში ვებგვერდზე შევა და ჯარიმას გადაიხდის 20-პროცენტიან ფასდაკლებას მიიღებს.