შინაგან საქმეთა სამინისტროს ინფორმაციით, 2019 წლის 9 თვეში სქესობრივი თავისუფლებისა და ხელშეუხებლობის წინააღმდეგ მიმართული 306 დანაშაული დაფიქსირდა.

უწყების ცნობით, 9 თვეში სექსუალური ხასიათის ქმედებისთვის პასუხისგებაში 152 პირი მიეცა, მათგან 114 პირი არასრულწლოვნის მიმართ ჩადენილ სექსუალური ხასიათის დანაშაულშია მხილებული. 2018 წლის ანალოგიურ პერიოდში, სისხლისსამართლებრივი პასუხისმგებლობა 127 პირს დაეკისრა.

მათივე ინფორმაციით, 9 თვეში, არასრულწლოვნის მიმართ ჩადენილ გარყვნილ ქმედებაში 39 პირი ამხილეს, ხოლო 2018 წლის ანალოგიურ პერიოდში — 16.

"2018 წელთან შედარებით, გარყვნილი ქმედების ჩადენის ფაქტებზე არასრულწლოვანთა და მათი მშობლების მხრიდან მომართვიანობის მაჩვენებელი მნიშვნელოვნად გაზრდილია, რაც ამ მიმართულებით საზოგადოების ცნობიერების ამაღლებაზე მიუთითებს", — აღნიშნავენ უწყებაში.

უწყების ცნობით, გარყვნილი ქმედების ფაქტებზე შეტყობინების ინიციატორები არიან:

  • ოჯახის წევრი/მშობელი — 53%;
  • დაზარალებული ბავშვი — 8%;
  • სოციალური მომსახურების სააგენტო — 6%;
  • მანდატურის სამსახური — 6%;
  • სკოლა — 4%;
  • მეზობელი — 3%;
  • ბავშვზე ზრუნვის ინსტიტუციები — 1%;
  • არასამთავრობო ორგანიზაცია — 1%;
  • სხვა — 18%.