თიბისი ბანკის დამფუძნებლის, ბადრი ჯაფარიძის თქმით, გამომძიებლებს მისთვის არ უკითხავთ, ვინ და რა სიტუაციაში გადასცა მას ე.წ. მუქარის წერილი. მისი თქმით, როცა გამოძიება ამით დაინტერესდება კითხვებს უპასუხებს.

ტელეკომპანია პირველის ეთერში ჯაფარიძემ განაცხადა ისიც, რომ წერილი პირდაპირ მიიღეს და გადაცემისას შუამავალი არ ყოფილა და თავდაპირველად საკითხი "არასწორად წარმოჩნდა".

"ჩვენ მივიღეთ ეს წერილი პირდაპირ. მე და მამუკა ვიყავით ადრესატები... მე გიდასტურებთ, რომ შუამავალი არ ყოფილა", — განაცხადა მან TV პირველზე, გადაცემა პირველების ეთერში.

21 ოქტომბერს თიბისის მეორე დამფუძნებელმა, მამუკა ხაზარაძემ განაცხადა, რომ სავარაუდო მუქარის წერილის შუამავალს გამოძიების დაწყების შემდეგ დასახელდება.

ხაზარაძემ მაშინ კიდევ ერთხელ თქვა, რომ წერილი მათ მაშინდელმა შინაგან საქმეთა მინისტრმა, გიორგი გახარიამ გადასცა, თუმცა ვისი შუამავლობდით არ დაასახელა.

"ორი საკითხი იყო. ერთი — სად არის დედანი, მეორე — ვინ არის შუამავალი. დედანი პროკურატურაშია. როგორც კი დაიწყება გამოძიება, შუამავალი დასახელდება", — უთხრა ხაზარაძემ ჟურნალისტებს.

მუქარის წერილი და ბრალდება გიორგი გახარიას

გიორგი გახარიასგან სავარაუდო მუქარის წერილის მიღების შესახებ თიბისი ბანკის დამფუძნებელმა, მამუკა ხაზარაძემ 4 მარტს პარლამენტში გამოსვლის დროს ისაუბრა. ამ პერიოდში გახარია ჯერ კიდევ შინაგან საქმეთა მინისტრი. წერილთან დაკავშირებით პროკურატურამ მამუკა ხაზარაძე სასამართლოში გამოკითხა.

ხაზარაძე-ჯაფარიძე ამბობენ, რომ პროკურატურას წერილის ასლი გადასცეს, რომელიც უწყებამ მოგვიანებით გაასაჯაროვა. დოკუმენტის მიხედვით, ხაზარაძეს სამ პირობის შესრულებას სთხოვდნენ:

  • პირველი — ტელეკომპანია პირველმა შეიცვალოს სარედაქციო პოლიტიკა და ტელეკომპანია იმედის მსგავსად ჩაერთოს ომში ოპოზიცის წინააღმდეგ;
  • მეორე — ხაზარაძემ გააკეთოს განცხადება, რომ მისთვის მიუღებელია ნაციონალური მოძრაობის რევანში და ბიზნესს კარგად ახსოვს, როგორ ექცეოდნენ წინა ხელისუფლების პირობებში;
  • მესამე — ტელეკომპანია არტარეა, რომელიც ხაზარაძის საკუთრებაა, "დაეტყოს ობიექტურობის მაღალი ხარისხი".

გარდა ამისა, ტელეკომპანია პირველის დამფუძნებელი ვახტანგ წერეთელი ფიგურირებდა თიბისი ბანკის საქმეში. კერძოდ, ის იყო კომპანიების სამგორი ემისა და სამგორი თრეიდის მფლობელი. სწორედ ამ კომპანიებზე გასცა და უკან ისესხა ფული თიბისი ბანკმა.

9 მარტს რუსთავი 2-მა გაავრცელა ინფორმაცია იმის შესახებ, რომ ხაზარაძეს გახარიას წერილი, სავარაუდოდ, ბადრი ჯაფარიძემ გადასცა. როგორც ტელეკომპანია აცხადებდა, ამ ინფორმაციას ორ წყაროზე დაყრდნობით ავრცელებდნენ. შაბათის კურიერის მტკიცებით, გიორგი გახარია და ბადრი ჯაფარიძე თბილისში ერთმანეთის მეზობლები არიან.

მამუკა ხაზარაძემ ეს ვარაუდი უარყო და განაცხადა, რომ ჯაფარიძე შუამავალი ვერ იქნებოდა, რადგან ისინი ერთ მხარეს დგანან.