თბილისის საერთაშორისო კინოფესტივალს ასეთი ტრადიცია აქვს: კინოს საშუალებით ცნობიერების ამაღლებისა და მაყურებლის საზოგადოებრივ მოვლენებში ჩართულობის მიზნით ფესტივალი ყოველ წელს აქტუალურ პრობლემას ირჩევს და განსაკუთრებულ ყურადღებას უთმობს. წელს ასეთი თემა პოლიტიკა იქნება.

2014 წელს მთავარი თემა ეკოლოგია იყო, მწვანე აქტივიზმი და მდგრადი განვითარების პრინციპებზე დაყრდნობილი ურბანული სივრცის ანალიზი. სექცია „მწვანე ფერის“ ფარგლებში დისკუსიები და სპეციალური ჩვენებები ჩატარდა, საფესტივალო ფერი კი, რომელიც ყოველ წელს იცვლება, იმ წელს მწვანე იყო.

2015-ში თბილისის საერთაშორისო კინოფესტივალის ფერი ღია იისფერი გახდა, კინოფესტივალი კი ქალთა უფლებებს მიეძღვნა. გენდერული დისბალანსისა და კრიზისის გააზრების საჭიროება საქართველოს პრეზიდენტის გადაწყვეტილებამაც განაპირობა, რომელმაც 2015 წელი ქალთა წლად გამოაცხადა. საქართველოს პირველი ლედის პატრონაჟით გამართულმა თბილისის საერთაშორისო ფესტივალის პროგრამამ მაყურებელს საშუალება მისცა საერთაშორისო კინონამუშევრების ფონზე ემსჯელა მწვავე საკითხებზე. ფილმები გენდერულ თანასწორობას, ქალთა პოლიტიკურ, სოციალურ თუ კულტურულ რეალიზაციას, ფემინიზმსა და ქალებზე ძალადობის თემებს ეხებოდა.

წელს პოლიტიკური კინოსადმი მიძღვნილი სექციის, ,,Bios Politikos’’ (პოლიტიკური ცხოვრება) მიზანია, მაყურებელს შეუქმნას ზოგადი წარმოდგენა ,,პოლიტიკურის’’ თანამედროვე შინაარსის შესახებ. სექციაში გაერთიანებულია როგორც დოკუმენტური, ისე მხატვრული ფილმები მსოფლიოს სხვადასხვა ქვეყნებიდან. შერჩეული 10 ფილმი არსებულ გლობალურ თუ ლოკალურ დაძაბულობას, პოლიტიკური ცხოვრების ყოველდღიურობას, პოლიტიკის სხვა სფეროებთან გადაკვეთასა და სხვა მნიშვნელოვან საკითხებს ეხმიანება.

პოლიტიკა და კინო ერთმანეთთან მჭიდროდაა გადაჯაჭვული. პოლიტიკურ რეჟიმს არაერთხელ შეუცვლია კინემატოგრაფიის სტილისტიკა და პირიქით, კინო ხშირად აძლევდა ბიძგს მნიშვნელოვან პოლიტიკური ცვლილებებს. სწორედ უსამართლო იდეოლოგიისა და მიუღებელი რეჟიმის წინააღმდეგ მიმართულმა ნამუშევრებმა წარმოშვა არაერთი მნიშვნელოვანი მოძრაობა, რომლებმაც თავის მხრივ სრულიად ახალ კინოაზროვნებას დაუდეს საფუძველი.

თბილისის საერთაშორისო კინოფესტივალი წელს 28 ნოემბერს დაიწყება და 4 დეკემბრის ჩათვლით გაგრძელდება.