იურიდიულ საკითხთა კომიტეტის სხდომაზე, სადაც უზენაესი სასამართლოს მოსამართლეობის კანდიდატ ლევან მიქაბერიძეს უსმენენ, დეპუტატმა, ეკა ბესელიამ მას საპროცესო ვადის დარღვევით გადაწყვეტილების მიღებაზე ჰკითხა.

ბესელიამ მოსამართლეების მხრიდან ვადის დარღვევის ფაქტები გააპროტესტა და თქვა, რომ მოსამართლე, რომელიც არის სამართლის დამდგენი, კანონს თავად არ უნდა არღვევდეს.

"მოსამართლე, რომელიც თავად არის სამართლის დამდგენი და უნდა იცავდეს კანონს, თავად არღვევს კანონს და ამას ისე შეგვაჩვიეთ ყველა იმიტომ, რომ ბევრი საქმე აქვს მოსამართლესო და ეს თითქოს ჩვეულებრივი ამბავია... მოსამართლე, რომელიც ორ პირს შორის ადგენს, ვინ არის მტყუანი და ვინ მართალი, თვითონ არღვევს ვადას და ეს ვითომც არაფერი", — თქვა ბესელიამ.

ამის შემდეგ მან უზენაესის კანდიდატ მიქაბერიძეს ჰკითხა, ვადის დარღვევის გამო თუნდაც დისციპლინური წესით თუ დაუჯარიმებიათ, რის შემდეგაც მიქაბერიძემ თავის მართლება დაიწყო.

"პირადი ცხოვრების ხარჯზე მიწევს ცალკეული საქმეების განხილვა. დაახლოებით 4 წლის განმავლობაში შვებულებით არ მისარგებლია, უფრო სწორად ვისარგებლე, მაგრამ ის საშვებულებო დღეები გამოყენებული მაქვს..." — თქვა მიქაბერიძემ, რომელსაც ბესელიამ საუბარი შეაწყვეტინა და მოუწოდა, რომ მიზეზებზე არ ესაუბრა.

ბესელიამ მისი და სხვა მოსამართლეების მისამართით თქვა, რომ არ მოსწონს, როცა "მოსამართლე წუწუნებს".

"მიზეზებზე შეგნებულად არ ვსაუბრობ... ბევრი ხანი ვიკვლიეთ ეს მიზეზები მოსამართლეებთან ერთად, დავადგინეთ და უკვე იცით სად ვართ, ამის გამო ცვლილებებიც მივიღეთ, ვთქვით რომ მოდით, გავუადვილოთ მოსამართლეებს, ერთპიროვნული გადაწყვეტის შესაძლებლობა მივცეთ... მიზეზებზე რომ ვისაუბროთ, შორს წავალთ... ეს თქვენი არჩევანია, გადაწყვიტეთ, რომ იყოთ მოსამართლე, ახლა გინდათ რომ უზენაესის მოსამართლე იყოთ, იცით, რომ ბევრი საქმე გაქვთ... მომიტევეთ, მაგრამ მოსამართლის წუწუნი არ მომწონს. მიმაჩნია, რომ ბევრი საქმე აქვს თუ ცოტა, უნდა გაართვას თავი, თუ ვერ გაართმევს, უნდა წავიდეს სახლში... მიუხედავად იმისა, რომ ძალიან კარგად ვიცი მიზეზები, არ არის ეს ჩემთვის გამამართლებელი მიზეზი", — აღნიშნა ბესელიამ.

ბესელიამ მოსამართლეებს მოუწოდა, რომ "თუ კარგად დაამენეჯმენტებენ, შესაძლებელია ამას გაუმკლავდნენ".