თავისუფალმა დემოკრატებმა ბრიფინგი გამართეს, რომელზეც ზურა აბაშიძემ, დავით ონოფრიშვილმა, გია ცაგარეიშვილმა და ვიქტორ დოლიძემ განაცხადეს, რომ პარტიას ტოვებენ და პოლიტიკურ საქმიანობას დროებით წყვეტენ.

"მე ბოლომდე გავაგრძელებ 5 უდანაშაულო თავდაცვის სამინისტროს თანამშრომლს, ჩვენი მეგობრების ციხიდან გამოსაშვებად ბრძოლას და მე, როგორც აღმოსავლეთ პარტნიორობის საპარლამენტო ასამბლეის პრეზიდენტი ვაგრძელებ მუშაობას ნოემბრამდე იმისთვის, რომ ნოემბრამდე საქართველოს უვიზო მიმოსვლასთან დაკავშირებით გადაწყვეტილება მიიღონ", - განაცხადა დოლიძემ.

როგორც პარტიის აღმასრულებელმა მდივანმა, თამარ კეკენაძემ განმარტა, მიუხედავად პარტიის ლიდერების გადაწყვეტილებისა, პარტია დაშლას არ აპირებს და ბრძოლას განაგრძობს:

"მე პირადად ქვეყნის ევროპული არჩევანისთვის დიდი ხანია ვიბრძვი, ამიტომ ჩამოვედი ერთი წლის წინ საქართველოში და შემოვუერთდი თავისუფალ დემოკრატებს. მიმაჩნია, რომ ეს ერთადერთი გზაა, რამაც უნდა გადაარჩინოს საქართველო. ჩვენ, მთელი გუნდი ამ ბრძოლაში ყოფნას ვაგრძელებთ. ჩვენი მაჟორიტარობის კანდიდატი აგრძელებს ჭიათურაში ბრძოლას და ჩვენ ვდგავართ მის გვერდით".