ე.წ. გავრილოვის ღამის 4 თვის თავზე მოძრაობამ ქვეყნის სამსახურში თელავში მსვლელობა გამართა. ევროკავშირისა და ნატოს დროშებით აქტივისტებმა ქალაქის ქუჩები მოიარეს და ხალხს 17 საათზე აქციაზე მისვლისკენ მოუწოდეს.

თელავის მერიამ აქციის გამართვაზე მათ უარი უთხრა და შესაბამისი წერილი გაუგზავნა. თუმცა, აქციის გასამართად ნებართვა საჭირო არ არის. მოძრაობის წევრებმა მერიის წერილი დაახვიეს და შენობაში დატოვეს.

#სირცხვილიას წევრების მიერ დაფუძნებულმა მოძრაობამ ქვეყნის სამსახურში რეგიონებში გასვლა დაიწყო. პირველი აქცია დღეს, 20 ოქტომბერს თელავში გაიმართება. აქცია ერეკლე მეფის მოედანზე, დღის 5 საათზე დაიწყება და 20 ივნისს თბილისში განვითარებულ მოვლენებს შეეხება.

#სირცხვილიამ სამთვიანი უწყვეტი საპროტესტო აქცია 20 სექტემბერს შეწყვიტა. აქტივისტებმა მანიფესტი გაავრცელეს და განაცხადეს, რომ შექმნიდნენ და გააძლიერებდნენ აქტივისტთა მობილურ ჯგუფებს თბილისსა და რეგიონებში, რომლებიც "მოსვენებას არ მისცემდნენ ივანიშვილის ლაქიებს". ასევე, იურიდიულ მხარდაჭერას გაუწევდნენ გავრილოვის ღამის დაკავებულებსა და დაზარალებულებს, შექმნიდნენ ახალ მედიაპლატფორმებს.