მოძრაობის ქვეყნის სამსახურში წევრები ამბობენ, რომ თელავის მერიამ ხვალინდელი აქციის გამართვაზე უარი უთხრა და მათ შესაბამისი წერილი გაუგზავნა. თუმცა, აქციის გასამართად ნებართვა საჭირო არ არის.

აქციის ერთ-ერთი ორგანიზატორი, გიგა მაქარაშვილი ამბობს, რომ მერიაში ცნობად შეიტანეს განცხადება, რომ ქალაქში აქციის გამართვას გეგმავენ.

"რატომღაც იფიქრეს, რომ ნებართვა ვითხოვეთ იმაზე, რისი კონსტიტუციური უფლებაც გვაქვს და გამოგვიგზავნეს წერილი, რომ არ მოგცემთ ნებართვასო", — ამბობს მაქარაშვილი.

მოძრაობის წევრებმა მერიის წერილი დაახვიეს და შენობაში დატოვეს.

#სირცხვილიას წევრების მიერ დაფუძნებული მოძრაობა ქვეყნის სამსახურში რეგიონებში გასვლას იწყებს და პირველ აქციას ხვალ, 20 ოქტომბერს თელავში გამართავს. აქცია ერეკლე მეფის მოედანზე, დღის 5 საათზე დაიწყება. აქცია 20 ივნისს თბილისში განვითარებულ მოვლენებს ეხება.

"20 ოქტომბერს თელავს მოვუყვებით სამოქალაქო მოძრაობის მიზნებზე, არჩევნებში წასვლის აუცილებლობაზე, მოვუსმენთ მათ პრობლემებს და გავაცნობთ ამა თუ იმ პრობლემის გადაჭრის გზებს", — ამბობენ ორგანიზატორები.

#სირცხვილია და 20 ივნისის აქცია

სამოქალაქო პროტესტი რუსი დეპუტატის სერგეი გავრილოვის საქართველოში ვიზიტმა და პარლამენტის თავმჯდომარის სკამიდან რუსულ ენაზე განცხადების გაკეთებამ გამოიწვია. შედეგად, გავრილოვმა საქართველო დატოვა, პარლამენტის თავმჯდომარე გადადგა. რუსეთმა საქართველოს "დასჯა განიზრახა" და სანქციების ბერკეტი აამოქმედა: რუსულ ავიახაზებს საქართველოში ფრენა აუკრძალა, რამდენიმე ღვინის ექსპორტიორი კომპანია დაბლოკა და აქციები "რუსოფობიად" მოიხსენია. ამის პარალელურად, დიპლომატიურმა კორპუსმა და მოქალაქეებმა ტურისტების მოზიდვის მიზნით დაიწყეს კამპანია #spendyoursummeringeorgia.

პარლამენტის თავმჯდომარის გადადგომას წინ უსწრებდა 20 ივნისის ღამე, როცა შსს-ს სპეციალურმა რაზმმა აქცია ძალის გამოყენებით რეზინის ტყვიებით, ცრემლსადენი გაზითა და წყლის ჭავლით დაშალა. მათი პოზიციით, იგეგმებოდა საქართველოს პარლამენტზე, როგორც ინსტიტუტზე შტურმი და დამხობა. დაშლის დროს დაშავდა ასობით ადამიანი, მათგან ორმა თვალი დაკარგა. აქციის მონაწილეები აქციებს მაშინდელი შს მინისტრის, გიორგი გახარიას გადადგომის მოთხოვნით მართავდნენ, თუმცა, ქართულმა ოცნებამ ის 3 სექტემბერს პრემიერ-მინისტრობის კანდიდატად წარადგინა. პარლამენტის წინ აქციები 93 დღის განმავლობაში მიმდინარეობდა.