სანდრა რულოვსის თქმით, მის მაჟორიტარულ ოლქში ჯერ კიდევ პირველი ტურია, რომელიც 22 ოქტომბერს ჩატარდება. მისივე თქმით, იგი პირველი ტურის შედეგის მიხედვით იფიქრებს, მიიღებს თუ არა მეორე ტურში მონაწილეობას:

"ჯიხაშკარში მოგეხსენებათ რომ იყო ყუთების დამტვრევისა და გატაცების ფაქტები. 22 ოქტომბერს ჩატარდება ორ უბანში პირველი ტური და მე ძალიან დიდი იმედები მაქვს. დიდი შანსია, რომ მოვიგოთ პირველივე ტურში და მერე დავფიქრდები მეორე ტურზე".

ამის შესახებ სანდრა რულოვსმა ენმ-ის პოლიტსაბჭოს სხდომის დამთავრების შემდეგ, ჟურნალისტებთან ისაუბრა. სანდრა რულოვსი სხდომას ესწრებოდა, მიუხედავად იმისა რომ იგი არ არის საბჭოს წევრი:

"მე არ ვარ პოლიტსაბჭოს წევრი და კენჭისყრაში მონაწილეობა არ მიმიღია, დისკუსიაში კი. მე ამ დღეებში შევხვდები ჩემს ამომრჩევლებს და მათგან მოვისმენ დამოკიდებულებას, თუ რა პოზიცია აქვთ გაყალბებული ციფრებით პარლამენტში ძლაუფლების გადანაწილებასთან დაკავშირებით".

ნაციონალური მოძრაობის პოლიტიკური საბჭოს სხდომა საათნახევრის განმავლობაში გრძელდებოდა. საბჭო სულ 66 წევრისგან შედგება და გადაწყვეტილება ხმათა უმრავლესობით მიიღეს.