#სირცხვილიას აქტივისტების ახალი მოძრაობა ქვეყნის სამსახურში რეგიონებში გასვლას იწყებს. მათი განცხადებით, მიზანი ქვეყნის სამსახურში მეტი ადამიანის გაწევრიანებაა.

აქტივისტების პირველი გაჩერება კახეთია, სადაც 20 ოქტომბერს, 19 საათზე, "გავრილოვის ღამის" ოთხი თვის თავზე, მოსახლეობასთან შეხვედრა გაიმართება.

"თელავს მოვუყვებით სამოქალაქო მოძრაობის მიზნებზე, არჩევნებში წასვლის აუცილებლობაზე, მოვუსმენთ მათ პრობლემებს და გავაცნობთ ამა თუ იმ პრობლემის გადაჭრის გზებს", — წერია განცხადებაში.

#სირცხვილიამ სამთვიანი უწყვეტი საპროტესტო აქცია 20 სექტემბერს შეწყვიტა. აქტივისტებმა მანიფესტი გაავრცელეს და განაცხადეს, რომ შექმნიდნენ და გააძლიერებდნენ აქტივისტთა მობილურ ჯგუფებს თბილისსა და რეგიონებში, რომლებიც "მოსვენებას არ მისცემდნენ ივანიშვილის ლაქიებს". ასევე, იურიდიულ მხარდაჭერას გაუწევდნენ გავრილოვის ღამის დაკავებულებსა და დაზარალებულებს, შექმნიდნენ ახალ მედიაპლატფორმებს.

20 ივნისის აქცია

20 ივნისს საქართველოს პარლამენტში რუსი დეპუტატის, სერგეი გავრილოვის მიერ თავმჯდომარის სკამის დაკავებას საპროტესტო ტალღა მოჰყვა. მოქალაქეებმა ანტისაოკუპაციო აქციები მოაწყეს პარლამენტთან და სასტუმროსთან, სადაც ასამბლეის წევრები გადაიყვანეს. დღის ბოლოს ისინი პარლამენტის წინ შეიკრიბნენ. ოპოზიციის წევრები ითხოვდნენ ირაკლი კობახიძის, ვახტანგ გომელაურისა და გიორგი გახარიას გადადგომას.

აქციის მონაწილეების ნაწილმა პარლამენტში შესვლა სცადა და ცენტრალურ გამზირზე მობილიზებულმა სპეცრაზმმა მათი დაშლა დაიწყო. სამართალდამცავებმა მოქალაქეების წინააღმდეგ რეზინის ტყვიები, ცრემლსადენი გაზი და წყლის ჭავლი გამოიყენეს. აქციის დაშლის დროს კლინიკებში 240 მოქალაქე გადაიყვანეს, რომელთაგან 80 სამართალდამცავი იყო. დაშავებულებიდან 2-მა თვალი დაკარგა, მათ შორის 18 წლის გოგომ. დაზიანებები მიიღეს 30-ზე მეტმა ჟურნალისტმა, მათ შორის იყო On.ge-ს სამი თანამშრომელი.

შინაგან საქმეთა სამინისტრომ სხვადასხვა სამართალდარღვევისთვის ჯამში 305 ადამიანი დააკავა. საქმეზე გამოძიება სისხლის სამართლის კოდექსის 225-ე მუხლით, რაც ჯგუფური ძალადობის ორგანიზებას, ხელმძღვანელობას ან მასში მონაწილეობას გულისხმობს.