ერთიანი ნაციონალური მოძრაობა აუცილებლად უნდა შევიდეს პარლამენტში და მიიღოს არჩევნების მეორე ტურში მონაწილეობა. ეს განცხადება დღეს გამართულ ბრიფინგზე ენმ-ის საგარეო ურთიერთობათა მდივანმა გიგა ბოკერიამ გააკეთა. მისივე აზრით, ენმ-მა უნდა გააკეთოს ყველაფერი, "რომ ივანიშვილმა ვერ შეძლოს საკონსტიტუციო უმრავლესობის მოპოვება":

"ჩვენი პოლიტიკური ძალა, როგორც ერთადერთი პრო დასავლური და დემოკრატიული ქმედითი ოპოზიციური ძალა ჩვენს ქვეყანაში აუცილებლად უნდა შევიდეს პარლამენტში და აუცილებლად უნდა მიიღოს მონაწილეობა არჩევნების მეორე ტურში. ეს არის აბსოლუტურად აუცილებელი ჩვენი ქვეყნის საშინაო და საგარეო გამოწვევებიდან და საფრთხეებიდან გამომდინარე. ეს არის აუცილებელი დემოკრატიული ინსტიტუტების და ტრადიციის პატივისცემიდან გამომდინარე. ეს არის აუცილებელი იმ 500 ათასი ამომრჩევლის პატივისცემიდან გამომდინარე, ვინც ჩვენ მოგვცა ხმა. ეს არის აუცილებელი იმ ადამიანების პატივისცემიდან გამომდინარე ვინც დააშინეს და ვერ მოგვცა ხმა. და დიახ! - იმ ადამიანების პატივისცემიდან გამომდინარე, ვინც არ მოგვცა ხმა. სწორედ იგივე არგუმენტებით ვთვლი, რომ უნდა მივიღოთ მონაწილეობა არჩევნების მეორე ტურში, რათა ყველაფერი გავაკეთოთ, რაც არ უნდა რთული იყოს და ჩვენ ვიცით, რომ ეს ძალიან რთული იქნება, ყველაფერი შევძლოთ, რომ ივანიშვილმა ვერ შეძლოს საკონსტიტუციო უმრავლესობის მოპოვება. ჩვენ უნდა გამოვიყენოთ ყველა დემოკრატიული ინსტიტუტი, რათა დავიცვათ თავისუფლება ჩვენი ქვეყნის შიგნით. მე დიდი იმედი მაქვს და მჯერა, რომ ჩვენი პოლიტიკური ძალა ამ სწორ გადაწყვეტილებას მიიღებს დღეს საღამოს."

ბოკერიას თქმით, პარტიის წევრთა პოზიციები გაყოფილია და ენმ აღნიშნულ გადაწყვეტილებებთან დაკავშირებით დღეს საღამოს პოლიტიკური საბჭოს სხდომაზე იმსჯელებს.