სექსუალურ ძალადობაში ბრალდებული ილია ჯიშკარიანის ადვოკატი, მარიამ კუბლაშვილი ქალთა ორგანიზაციას ბულინგში ადანაშაულებს. ამის შესახებ მან On.ge-სთან საუბრისას განაცხადა.

"როგორი ბულინგი და აგრესიაც მოდის უშუალოდ ქალი უფლებადამცველების მხრიდან... ქალი ადვოკატის უფლებებს ლახავენ, როცა მე ჩემს უფლებამოსილებას ვახორცილებ..." — ამბობს კუბლაშვილი.

მისი თქმით, მას დისკომფორტის გრძნობა არ აქვს, როცა სექსუალურ ძალადობაში ბრალდებულ კაცს იცავს, რადგან ფიქრობს, რომ თამთა თოდაძემ "მამისხელა კაცი" გაწირა:

"დისკომფორტი არ მაქვს, როცა ქალი ადამიანს იმეტებს იმისთვის, რომ საკუთარი ნების განსახორციელებლად გაწიროს მამის ხელა კაცი, დააბრალოს ის, რაც მას ნამდვილად არ ჩაუდენია, დაესხას თავს და შემდეგ თავი მსხვერპლად წარმოაჩინოს, მე არ მიმაჩნია, რომ ამ ქალის წინაშე რაიმე სახის უხერუხლობა უნდა მქონდეს".

კუბლაშვილს ჰგონია, რომ ჯიშკარიანი არამხოლოდ თოდაძემ არამედ ყოფილმა თანაგუნდელებმა, ქართულმა ოცნებამაც გაწირა:

"პროცესი პოლიტიკურად წარიმართა, მმართველმა გუნდმა გაწირა ჩემი დაცვის ქვეშ მყოფი. თავიდანვე ვხედავდი, რომ ის იყო მსხვერპლი და გაიწირებოდა და ამიტომ ჩავერთე. დავინახე, რომ მას დაცვა ნამდვილად სჭირდებოდა და უფრო სუსტ პოზიციაში იყო".

სექსუალური ძალადობის საქმე

ძალადობის სავარაუდო მსხვერპლი ყვება, რომ ჯიშკარიანმა მასზე სექსუალური ძალადობა სცადა და როცა გაქცევა მოახერხა, შემდეგ ფიზიკურად იძალადა. შინაგან საქმეთა სამინისტრომ საქმეზე გამოძიება სამი მუხლით დაიწყო.

გარდა ამისა, თამთა თოდაძე ამბობს, რომ პოლიცია სავარაუდო დანაშაულის ადგილზე რამდენიმესაათიანი დაგვიანებით მივიდა. მისი თქმით, სავარაუდო დანაშაული დღის ოთხ საათზე მოხდა, ხოლო სამართალდამცავები ადგილზე მხოლოდ ღამის სამ საათზე მივიდნენ და ოთახი უკვე დალაგებული დახვდათ.

თამთა თოდაძის დედა აცხადებს, რომ ილია ჯიშკარიანის მეგობარი მასთან მივიდა და მორიგება შესთავაზა. როგორც მან ჟურნალისტებს უთხრა, მორიგების პირობა მან არ იცის, თუმცა საკითხი ბრალდების უარყოფას ეხებოდა.