საპარლამენტო არჩევნების მეორე ტურის ჩატარების მაქსიმალური ვადაა 2 ნოემბერი. ამის შესახებ ცესკოს პრეს-სპიკერმა ანა მიქელაძემ On.ge-სთან განაცხადა. მისი განმარტებით, არის შანსი რომ 2 ნოემბრამდე გაიმართოს მეორე ტური, მას შემდეგ რაც შეჯამების პროცესი დასრულდება ოლქებში:

"კანონმდებლობის თანახმად, მეორე ტური იმართება არჩევნების პირველი ტურიდან, არაუგვიანეს 25 დღისა. ბოლო ვადა არის 2 ნოემბერი კანონმდებლობის მიხედვით, თუმცა შეიძლება ჩატარდეს უფრო ადრე, როდესაც დასრულდება შეჯამების პროცესი. ახლა მიმდინარეობს ეს პროცესი ოლქებში, იქ არის საჩივრები გასაჩივრებისთვის, რომლებსაცა ქვს შესაბამისი ვადები. ამის შემდეგ, თუკი მხარეები სურვილს გამოთქვამენ, შეუძლიათ უბნის მონაცემებთან დაკავშირებული საჩივრები შეიტანონ საოლქოს გადაწყვეტილების შემდეგ სასამართლოში და იქ გაასაჩივრონ. ასევე, ოლქის გადაწყვეტილება შემაჯამებელ ოქმთან დაკავშირებით, შეიძლება გასაჩივრდეს ცენტრალურ საარჩევნო კომისიაში".

ამ მომენტისთვის არსებული წინასწარი მონაცემებით, გამარჯვებული მაჟორიტარი კანდიდატების გამოსავლენად მეორე ტური დაინიშნება 50 ოლქში. მეორე ტურში მონაწილეობას იღებს ის ორი კანდიდატი, რომლებმაც პირველ ტურში ყველაზე მეტი ხმა მიიღეს.

ვინ რა შედეგი მიიღო სხვადასხვა ოლქში უბნების მიხედვით შეგიძლიათ იხილოთ აქ.