მოძრაობა ლელოს დამფუძნებელი, მამუკა ხაზარაძე მაია ცქიტიშვილზე გაკეთებული სექსისტური განცხადების შემდეგ ამბობს, რომ მისთვის თანასწორობა და ქალთა უფლებების დაცვის საკითხი მნიშვნელოვანია. ამის შესახებ ის Facebook-ზე წერს.

ხაზარაძე თავს იმით იმართლებს, რომ მისი გამონათქვამი არ გულისხმობდა სქესს და ზუსტად იგივე კონტექსტში ახსენა ხაჭაპურის ცხობა ერთ-ერთ გადაცემაში პროკურატურაზე საუბრისას.

"თუ ვინმემ ეს გამონათქვამი ქალების შეურაცხყოფად ჩათვალა, მინდა ხაზგასმით განვმარტო: ეს გამოთქმა არ გულისხმობდა მინისტრის სქესს. ზუსტად იგივე კონტექსტში ვახსენე ხაჭაპურის ცხობა გასულ კვირას ინგა გრიგოლიას გადაცემაში პროკურატურაზე საუბრისას. ("ხაჭაპურებივით აცხობენ საქმეებს"). მინდა ძალიან მკაფიოდ განვაცხადო ორი რამ: ქალთა თანასწორობა და უფლებების დაცვის საკითხი ჩემთვის და ჩემი თანაგუნდელებისთვის პრინციპულად მნიშვნელოვანია; და ამის დასტურია ბევრი ქალი ჩვენს გუნდში და თანასწორი გარემო, რომელსაც აქ ვქმნით", — წერს ხაზარაძე.

მისივე თქმით, რომ არ იყოს ორაზროვნება, ის კვლავ მიიჩნევს, რომ "მინისტრი ცქიტიშვილი არაკომპეტენტურია, ისევე, როგორც ოცნების მთავრობა ბიძინა ივანიშვილის თამადობით".

"საკმარისია ხაჭაპურზე კომენტარები, ისაუბრეთ გაჩერებულ ქვეყანაზე", — აღნიშნავს ხაზარაძე.

დღეს, 3 ოქტომბერს თიბისი ჯგუფისა და მოძრაობა ლელოს დამფუძნებელმა, მამუკა ხაზარაძემ ინფრასტრუქტურის მინისტრის გასაკრიტიკებლად სექსისტური გამონათქვამი გამოიყენა.