უკრაინაში პრეზიდენტ ვოლოდიმირ ზელენსკის გადაწყვეტილებას ოკუპირებულ ტერიტორიაზე არჩევნების ე.წ. "შტაინმაიერის ფორმულით" გამართვის შესახებ მოქალაქეებმა გააპროტესტეს. ნაციონალისტებმა კიევში, პრეზიდენტის სასახლესთან მოწყობილ აქციაზე ზელენსკის გადაწყვეტილება "კაპიტულაციად" შეაფასეს. ისინი სკანდირებდნენ "არა ოკუპაციას".

ფოტო: Reuters

დოკუმენტს ხელი პირველ ოქტომბერს უკრაინის წარმომადგენელმა, ლეონიდ კუჩმამ საკონტაქტო ჯგუფის ფორმატში მოაწერა. ამ შეთანხმების შემდეგ, სავარაუდოდ, ნორმანდიის სამიტი გაიმართება.

შტაინმაიერის გეგმა უკრაინის აღმოსავლეთით, სეპარატისტების მიერ კონტროლირებად ტერიტორიებისთვის "განსაკუთრებული სტატუსის" მინიჭებას ითვალისწინებს. კანონი განსაკუთრებული სტატუსის შესახებ სამართლიანი არჩევნების ჩატარების შემდეგ ამოქმედდება.

პრეზიდენტი ზელენსკი მოსახლეობას დაპირდა, რომ ეს "არჩევნები იარაღის მუქარით არ ჩატარდება", "არ იქნება კაპიტულაცია" და მხოლოდ საერთაშორისოდ აღიარებულ სტანდარტებს დაექვემდებარება.

რას გულისხმობს "შტაინმაიერის ფორმულა"

გეგმა გერმანიის ყოფილ საგარეო საქმეთა მინისტრისა და ახლა უკვე პრეზიდენტის, ფრანკ-ვალტერ შტაინმაიერის სახელს ატარებს და ის მოიცავს:

  • უკრაინის კანონმდებლობით გამართულ თავისუფალ და სამართლიან არჩევნებს აღმოსავლეთ უკრაინის რეგიონებში;
  • ჩატარებული არჩევნების სამართლიანობის დადასტურებას ეუთოს სადამკვირვებლო მისიის მიერ;
  • შედეგად, თვითმმართველი სტატუსის დაბრუნებას.

ფორმულის თანახმად, "განსაკუთრებული სტატუსი დონეცკისა და ლუგანსკის ოლქების ცალკეულ რაიონებში ძალაში შედის ადგილობრივი დროით 20 საათზე ვადამდელი არჩევნებისას, რომელიც ინიშნება და ტარდება უკრაინის კონსტიტუციისა და, ასევე, ზემოხსენებულ რეგიონებში ვადამდელი ადგილობრივი არჩევნების ჩატარების მარეგულირებელი უკრაინის სპეციალური კანონის შესაბამისად".

რუსეთმა უკრაინის ქმედება მოიწონა. კრემლის პრესსპიკერმა, დიმიტრი პესკოვმა იმედი გამოთქვა, რომ ნორმანდიის სამიტი მალე გაიმართება.

ზელენსკის წინამორბედმა, პეტრო პოროშენკომ გარიგებას "პუტინის ფორმულა" უწოდა. მისი თქმით, "შტაინმაიერის ფორმულა" კრემლში შექმნეს და რუსულ ინტერესებს ატარებს.