შინაგან საქმეთა სამინისტროს ინფორმაციით, დააკავეს კაცი, რომელიც მსახიობი ეკა ჩხეიძეს ქორწინებას აიძულებდა. ამის შესახებ On.ge-ს უწყებაში უთხრეს.

მათივე ცნობით, გამოძიება სისხლის სამართლის კოდექსის 150¹ მუხლის პირველი ნაწილით და 236 მუხლის მესამე და მეოთხე ნაწილებით მიმდინარეობს, რაც ქორწინების იძულებასა და ცეცხლსასროლი იარაღის მართლსაწინააღმდეგო შეძენა-შენახვას გულისხმობს.

დაკავებულს თბილისის საქალაქო სასამართლო აღკვეთი ღონისძიების სახით 3 000-ლარიანი გირაო შეუფარდა პატიმრობის უზრუნველყოფით. საქმის პროკურორის თქმით, დაკავებული ეკა ჩხეიძეს ორ წელზე მეტია იცნობს და ამ პერიოდის განმავლობაში მას ქორწინებას სთხოვდა, წინააღმდეგ შემთხვევაში თვითმკვლელობით იმუქრებოდა. საქმეზე წინასასამართლო სხდომა 31 ოქტომბერს, 11 საათზე დაინიშნა.